29 ноябр дар меҳмонхонаи Ҳайят - Реҷенсии шаҳри Душанбе нахустин Форум ва Намоишгоҳи байналмилалии истихроҷи маъдан ва металлургии Тоҷикистон баргузор гардид, ки дар он намояндагони кишварҳои ИДМ, Амрико, Аврупо, Осиё ва кишварҳои арабӣ, вазорату идораҳои соҳавии ин кишварҳо, ниҳодҳои молиявӣ, ширкатҳои фаромиллӣ, доираҳои тиҷоратӣ, ва дигар ҷонибҳои манфиатдор ширкат варзиданд.

Форуми мазкурро Ҳукумати Ҷумҳурии Тоҷикистон дар якҷоягӣ бо шарикони саноати кӯҳӣ дар ҳамкорӣ бо ширкати “Восток Капитал” баргузор карданд.

Дар кори Форум Ҳаким Холиқзода, муовини аввали Сарвазири мамлакат ва Шералӣ Кабир вазири саноат ва технологияҳои нави Тоҷикистон ҳамаи иштирокчиён ва меҳмононро ба Тоҷикистон хайри мақдам намуда, онҳоро аз рушди ин соҳа ва ба мамлакати индустриалӣ –аграрӣ табдил шудани Тоҷикистон ёдрас карданд.

Сипас, дар рафти форум намояндагони ин соҳа дурнамои рушди бозори кӯҳӣ ва металлургии кишвар, навовариҳо дар истифодаи таҷҳизот ва технологияҳои истихроҷ ва коркарди маъданҳо, технология барои рушди устувор ва як қатор масъалаҳои дигарро муҳокима намуданд.

Ҳамзамон, дар доираи Форуми мазкур байни доираҳои соҳибкорию сармоягузории Тоҷикистон, Узбекистон, Озарбойҷон як қатор санадҳои дуҷонибаи ҳамкорӣ ба имзо расонида шуд.

Дар нимаи дуюми рӯз тибқи барномаи Форум ҷаласаи умумӣ, сесияҳо ва мизҳои мудаввар баргузор гардид.

Мақсад аз баргузории ин чорабиниро масъулин дар ноил шудан ба ҳадафи чоруми стратегии Ҷумҳурии Тоҷикистон - саноатикунонии босуръати кишвар, дастгирии рушди устувори соҳаи саноат, таҷдид ва тавсеаи ҳамкориҳои минтақавӣ, инчунин, фаъолсозӣ ва рушди ҳамкорӣ дар соҳаи саноат маънидод карданд.

Наҷиба МУРОДБЕКОВА, “ҶТ”