Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода имрӯз - 5 феврал зимни нишасти матбуотӣ аз коҳиши талоқу никоҳҳои бармаҳал, ки бо қарори суд амалӣ мешуд, иттилоъ дод.

Ба гуфтаи ӯ, дар соли гузашта дар кишвар 8 ҳазору 535 ҳолати бекор гардидани ақди никоҳ ба қайд гирифта шудааст, ки нисбат ба соли 2024 567 ҳолат камтар аст.

Раиси Кумита ҳамчунин изҳор дошт, ки дар натиҷаи ҷудошавии оилаҳо 7 ҳазору 385 кӯдаки ноболиғ аз яке аз волидайн падар ва ё модар дур мондаанд. Ин нишондиҳанда дар қиёс ба соли 2024 1 011 кӯдак коҳиш ёфтааст.

Ҳамзамон Бунафша Файзиддинзода зикр намуд, ки соли 2025 дар асоси қарорҳои судӣ, яъне бо иҷозати кам кардани синни никоҳ, 603 ҳолати ақди никоҳ ба қайд гирифта шудааст. Ин нишондиҳанда нисбат ба соли гузашта 168 ҳолат камтар мебошад.

Ба гуфти ӯ коҳиши чунин омор натиҷаи корҳои фаҳмондадиҳӣ, баланд бардоштани маърифати ҳуқуқии шаҳрвандон ва тадбирҳои пешгирикунандаи мақомоти дахлдор арзёбӣ мегардад.

Малика МУҚАДДАМОВА, “ҶТ”