Дар Китобхонаи миллии Тоҷикистон 26-уми апрел бо ташаббуси Кумитаи кор бо занон ва оилаи назди Ҳукумати Ҷумҳурии Тоҷикистон дар доираи чорабиниҳои Муколамаи занони Осиёи Марказӣ якумин Форуми минтақавӣ таҳти унвони “Нақши занон дар мақомоти ҳифзи ҳуқуқ ва мудофиа дар Осиёи Марказӣ” баргузор гардид.

Ташаббуси мазкур бо мақсади иҷрои уҳдадориҳои сиёсии Ҷумҳурии Тоҷикистон дар мавриди амалисозии санадҳои байналмилалии эътирофрамудаи Ҳукумати кишвар дар самти барҳам додани ҳама гуна табъиз нисбати занон, таъмини иштироки баробари занону мардон дар раванди қабули қарор ва сулҳофарӣ мебошад.

Ба гуфти масъулин, форум бо мақсади дар амал татбиқ намудани Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони болаёқат барои солҳои 2023-2030, Стратегияи миллии фаъолгардонии нақши занон дар Ҷумҳурии Тоҷикистон барои солҳои 2022-2030 ва Барномаи давлатии пешгирии зӯроварӣ дар Ҷумҳурии Тоҷикистон барои солҳои 2014-2023 нигаронида шудааст.

Бояд қайд намуд, ки форуми мазкур, ҳам дар шакли ҳузурӣ ва ҳам онлайнӣ сурат гирифт. Дар он намояндагони сохторҳои давлатӣ аз кишварҳои Осиёи Марказӣ ширкат ва суханронӣ намуданд.

Иштирокдорони форум масъалаҳои ҷалби занон ҳамчун субъекти фаъол дар раванди идоракунӣ, қабули қарор, аз ҳисоби занон зиёд намудани ҳайати роҳбарикунандаи мақомоти ҳифзи ҳуқуқ, мудофиа ва дар мақомоти салоҳиятдори давлатӣ дар самти пешгирии зӯроварӣ нисбати занон ва духтарон, баланд бардоштани сифати кумак ба занону духтарони гирифтори зӯроварӣ дар мақомоти салоҳиятдор ва муассисаҳои давлатӣ, рушди ҳамкориҳои сохторҳои давлатӣ бо ҷомеаи шаҳрвандӣ ва дигар мавзуъҳои вобаста ба занонро мавриди баррасӣ қарор доданд.