Дар бинои дастгоҳи раиси Вилояти Мухтори Кӯҳистони Бадахшон Маркази иттилоотӣ ва ахборотии ҳолатҳои фавқулодаи вилоят таъсис ёфт.

Тавре аз бахши таҳлилию иттилоотии дастгоҳи раиси вилоят иттилоъ доданд, марказ ҳамчун равзанаи ягона тавассути шабакаи интернет тамоми раёсату муассисаҳои дахлдорро ба ҳам пайваста, ахбороту маълумоти зарурӣ дар байни идораҳо табодул меёбад ва саривақт ба роҳбарияти вилояту мақомоти дахлдори марказӣ иттилоъ пешниҳод мегардад.

Инчунин марказ ба таври маҷозӣ маълумот оид ба вазъи обу ҳаво, кушода ё баста шудани роҳҳо ва дигар ҳолатҳои фавқулодаро дар ҳудуди вилоят муайяну пайгирӣ намуда, саривақт масъулинро аз вазъи мавҷуда огоҳ месозад.

Ба иттилои манбаъ дар вақти зарурат, роҳбарияти вилоят имкон дорад, ки ба таври маҷозӣ фавран бо тамоми масъулини марбута ва ё роҳбарияти мақомоти марказӣ дар иртибот қарор гирифта, мушкилоти мавҷударо дар мавридаш баррасӣ ва барои ҳалли онҳо чораандешӣ кунад.

Марказ бо таҷҳизоти ҳозиразамони компютерӣ, нусхабардорӣ, наворгирию сабткунӣ муҷаҳҳаз буда, дар ифтитоҳи он раиси вилоят Ёдгор Файзов, директори иҷроияи Оҷонсии Оғохон оид ба макони зист Ҳадӣ Ҳусайнӣ иштирок намуданд.