8 сентябр дар шаҳри Деҳлии Ҷумҳурии Ҳиндустон 44-умин ҷаласаи Ассамблеяи генералии ҳисоботию интихоботии Шурои олимпии Осиё доир гардид.

Дар ин хусус гурӯҳи фейсбукии Кумитаи миллии олимпии Тоҷикистон иттилоъ медиҳад.

Бино ба иттилои манбаъ дар кори ҷаласа Ҷумҳурии Тоҷикистонро Дилшод Назаров, ноиби Президенти Кумитаи миллии олимпии Тоҷикистон ва Абдуллоев Фурқон, менеҷери Департаменти робитаҳои берунӣ, коргузорӣ ва иттилооти Кумита намояндагӣ карданд.

Гуфта мешавад, ки дар кори ҷаласа Чен Вейцян, ноиби раиси шаҳри Ҳангжоуи Ҷумҳурии Мардумии Чин гузориши ҷамъбастӣ оид ба 19-умин Бозиҳои тобистонаи Осиёӣ Ҳангжоу пешниҳод намуда, аз ҷониби масъулини Шурои олимпии Осиё бошад оид ба рафти омодагиҳо доир ба бозиҳои дар пеш истодаи Осиёӣ, ки дар Аичи Нагаяи Ҷопон баргузор мегардад, гузориш дода шуд.

Ҳамчунин, дар ин ҷаласа Дилшод Назаров, ноиби Президенти Кумитаи миллии олимпии Тоҷикистон раиси Кумитаи варзиши Шурои олимпии Осиё ва ҳамзамон аъзои Кумитаи иҷроияи Шурои олимпии Осиё интихоб гардид.

Инчунин Раҷа Рандхир Сингҳ бо гирифтани 44 овоз аз 45 райъдиҳандаи кумитаҳои миллии олимпии қораи Осиё президенти Шурои олимпии Осиё интихоб шуд.

Зимнан дар кори ин ҷаласа Кумитаи тадорукот ва масъулини Шурои олимпии Осиё нақшаҳо ва омодагиҳои худро оид ба баргузории Бозиҳои Осиёии дарпешистода муаррифӣ намуданд.

Гулафшон КАРИМОВА, “ҶТ”