Кумита оид ба таҳсилоти ибтидоӣ ва миёнаи касбӣ дар муассисаҳои таълимӣ фанни истифодабарандаи зеҳни сунъиро ҷорӣ намудааст.

Дар ин бора 2 феврал Фарҳод Раҳимӣ, раиси Кумита оид ба таҳсилоти ибтидоӣ ва миёнаи касбӣ зимни нишасти матбуотӣ иттилоъ дод.

Ба гуфтаи раиси Кумита, дар ин самт фанни истифодабарандаи зеҳни сунъӣ роҳандозӣ гардидааст, ки дар доираи он омӯзгорони фанни информатика ҷалб гардида, курсҳои махсуси зеҳни сунъиро аз худ намудаанд.

- Мо дар зинаи худ нахустин коре кардем, ин омӯзиши зеҳни сунъӣ ба омӯзгорони фанни информатика буд, ки 48 нафар аввал курси такмили ихтисосро гузашта, соҳиби сертификатҳо гардиданд, - иброз дошт Фарҳод Раҳимӣ.

Инчунин, номбурда таъкид намуд, ки омӯзгорони курсро гузашта вазифадор шуданд, ки ба дигар устодон, кормандон ва донишомӯзон чӣ тавр истифода бурдани зеҳни сунъиро омӯзонанд.

Мавриди зикр аст, бо ташаббуси Шурои зеҳни сунъии назди Вазорати саноат ва технологияҳои нави Тоҷикистон аз оғози соли хониши 2025 дар беш аз 100 мактаби кишвар дарсҳои иловагии зеҳни сунъӣ роҳандозӣ гардид ва то соли 2028 бояд дар ҳамаи мактабҳо дарси “Асосҳои зеҳни сунъӣ” ҷорӣ карда шавад.

Шаҳноза АЗИМОВА, коромӯзи “ҶТ”