Бо ташаббуси Кумитаи ҷавонон, варзиш ва сайёҳӣ ва КВД маркази ҷумҳуриявии фарҳангии ҷавонон “Ориёно” бахшида ба Рӯзи байналмилалии ҳифзи кӯдакон таҳти унвони “Кӯдакон ояндаи моянд” чорабинии фарҳангӣ баргузор гардид. Дар он 120 нафар кӯдаки ниёзманд аз мактаб-интернати рақами 1-и шаҳри Душанбе ва кӯдакону наврасони пойтахт ширкат доштанд.



Аҳтам Абдуллозода, раиси Кумитаи ҷавонон, варзиш ва сайёҳи назди Ҳукумати ҷумҳурӣ замни сухани табрикӣ, аз ҷумла иброз дошт, ки аз рӯзҳои аввали ба даст овардани Истиқлолият таваҷҷуҳ ва ғамхории роҳбарияти давлату Ҳукумати кишвар нисбат ба кӯдакон ва насли наврасу ҷавон бештар аст. Ҳар тадбире, ки дар мамлакат амалӣ карда мешавад, барои беҳбудии ҳаёти кӯдакону наврасон ва ба хотири ояндаи неки Ватани азизамон аст. 

Зикр шуд, ки таваҷҷуҳ, ғамхорӣ, тарбия ва таълими кӯдакону наврасон раванди ниҳоят масъулиятнок ва ҷиддӣ буда, тақдири кӯдак ва насли ояндаи ҷомеа ба сифати он вобаста аст. Дар ин замина таълиму тарбияи кӯдакон бояд дар мадди назари падару модар, омӯзгор, муассисаҳои таълимию тарбиявӣ ва аҳли ҷомеа қарор гирад, чунки фардои ин ё он кишварро ҳамон вақт метавон шукуфону  пурфурӯғ арзёбӣ кард, агар ба таълиму тарбияи кӯдакон таваҷҷуҳи ҳамешагӣ зоҳир шавад.

Раиси Кумитаи ҷавонон, варзиш ва сайёҳӣ Аҳтам Абдуллозода ба 120 нафар кӯдаки ниёзманд тӯҳфа ва китобҳои шавқовар тақдим намуд.