Ба 4 аъзои оилаи кормандони мақомоти бехатарии озуқаворӣ, ки дар давоми шаш моҳи соли ҷорӣ аз бемории сироятии коронавирус фавтиданд, дар ҳаҷми 11469 сомонӣ кўмакпулӣ дода шуд.

Ин нуктаро 16-уми июл раиси Кумитаи бехатарии озуқавории назди Ҳукумати Ҷумҳурии Тоҷикистон Файзуллозода Муҳаммадсаид зимни нишасти матбуотии ин ниҳод иброз намуд.

Номбурда гуфт, ки баҳри муборизаи дастаҷамъона кормандони кумита барои пешгирии бемории сироятии коронавирус ба фонди махсус кӯмакпулӣ ва ба Маҷмааи тандурустии “Истиқлол” лавозимоти тиббӣ, дар маҷмӯъ ба маблағи 150 ҳазор сомонӣ кўмакҳои хайриявӣ намуданд.

Дар идома гуфта шуд, ки дар нимсолаи аввали соли 2020 аз ҷониби мутахассисони озмоишгоҳҳои Кумитаи бехатарии озуқавории назди Ҳукумати кишвар 33865, 8 кг маҳсулоти гӯштӣ, 5731,6 литр маҳсулоти ширӣ, 11 310 дона тухми ғизоӣ, 53083,8 кг меваю сабзавот, 434, 2 кг моҳӣ, 2753 кг маҳсулоти намакин, 656 литр равғани растанӣ, 6059,8 кг маҳсулоти полезӣ ва 346 кг асал ҳамчун маҳсулоти пастсифати барои саломатӣ хавфнок муайян ва аз фурӯш боздошту нобут карда шуданд.

Садбарг СУЯРОВА, "ҶТ"