Имрӯз дар шаҳри Душанбе Форуми ҷавонони Осиёи Марказӣ ва давлатҳои аъзои Шурои ҳамкории кишварҳои Халиҷ ба кори худ оғоз кард.

Дар ифтитоҳи расмии Форум Дилрабо Мансурӣ, муовини Сарвазири Ҷумҳурии Тоҷикистон, Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, роҳбарони ҳайатҳои кишварҳои иштирокчӣ, корпуси дипломатӣ ва дигар нафарони масъул иштирок ва суханронӣ карданд.

Тибқи барнома давоми рӯз бо мақсади таҳкими ҳамкориҳо ҷаласаҳои панелӣ доир мешаванд.

Хотиррасон мекунем, ки Форум аз 21 то 24 майи соли 2025 дар шаҳри Душанбе идома меёбад. Дар он 80 нафар ҷавонон аз 10 кишвари Осиёи Марказӣ ва минтақаи Халиҷ ва 4 ташкилоти байналмилалӣ иштирок доранд.

Форум ҳамчун платформаи фаромарзии ҷавонон ба тавсеаи ҳамкории минтақавӣ ва байналмилалӣ байни насли ҷавон, муаррифии иқтидор ва имконоти онҳо, инчунин ташвиқи ташаббусҳои муштарак дар самтҳои муҳимми рушди устувор, инноватсия, муҳити зист, варзиш, фарҳанг ва таҳкими муносибатҳои дӯстона байни давлатҳои ду минтақа нигаронида шудааст.

Форуми мазкур қадами муҳимму стратегӣ дар таҳкими пайванд байни насли ҷавони Осиёи Марказӣ ва давлатҳои аъзои Шурои ҳамкории кишварҳои Халиҷ арзёбӣ мешавад. Баргузории чунин ҳамоишҳо на танҳо ба рушди шабакаи ҳамкорӣ байни ҷавонон мусоидат мекунад, балки ба рушди дипломатияи мардумӣ ва таҳкими дӯстию ҳамдилӣ байни давлатҳо низ такони нав мебахшад.

Ин Форум бо ибтикори Президенти Ҷумҳурии Тоҷикистон муҳтарам Эмомалӣ Раҳмон дар аввалин нишасти сарони давлатҳои Осиёи Марказӣ ва Шурои ҳамкории кишварҳои арабии Халиҷ (GCC), ки моҳи июли соли 2023 дар шаҳри Ҷиддаи Арабистони Саудӣ баргузор гардида буд, пешниҳод шуда, дастгирӣ ёфт.

“ҶТ”