Имрӯз иҷлосияи чоруми Маҷлиси вакилони халқи шаҳри Душанбе, даъвати ҳафтум, бо роҳбарии Раиси маҷлиси вакилони халқи шаҳри Душанбе муҳтарам Рустами Эмомалӣ доир гардид.

Дар ин бора дафтари матбуоти шаҳрдорӣ хабар додааст.

Тибқи иттилоъ, пас аз интихоб намудани котиботи иҷлосия ва тасдиқ намудани масъалаҳои рӯзнома, нахуст оид ба натиҷаи ҷамъбасти рушди иҷтимоию иқтисодии шаҳри Душанбе дар ёздаҳ моҳи соли 2025 ва вазифаҳо барои соли 2026, ҳисоботи Раиси шаҳри Душанбе муҳтарам Рустами Эмомалӣ шунида шуд.

Пас аз анҷоми суханронӣ муҳтарам Рустами Эмомалӣ ба муовини якум ва муовинони раиси шаҳри Душанбе якҷо бо сохторҳои дахлдор супориш доданд, ки ҷиҳати таъмини иҷрои нақшаи чорабиниҳо, босифат ва дар муҳлати муайянгардида анҷом додани корҳои сохтмонию ободонӣ, таъмиру азнавсозии роҳҳо ва тадбиқи саривақтии лоиҳаҳои дар шаҳри Душанбе амалишаванда чораҳои дахлдор андешанд.

Сипас вакилон лоиҳаи буҷети шаҳри Душанбе барои соли 2026 ва тасдиқи иҷрои буҷети шаҳри Душанбе дар соли 2024-ро мавриди баррасӣ қарор дода, дар робита ба ин, гузориши сардори Сарраёсати молияи шаҳри Душанбе шунида шуд.
Раиси шаҳри Душанбе ба масъулин дастур доданд, ки ҷиҳати самаранок истифода намудани буҷети шаҳри Душанбе чораҳои саривақтӣ андешида, бобати иҷрои нақшаи даромади он тадбирҳои заруриро роҳандозӣ намоянд.

Дар рафти иҷлосия Раиси маҷлиси вакилони халқи шаҳри Душанбе муҳтарам Рустами Эмомалӣ бобати тарғиби фарҳанги миллӣ, хосатан либоси миллӣ таъкид намуданд: “Агар забони миллат яке аз ҷузъҳои асосии ҳувият ва ҳастии ҳар миллат бошад, пас либоси миллӣ ҷузъи дигари муҳими он маҳсуб меёбад”.

“ҶТ”