17 августи соли ҷорӣ Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода ҷиҳати шиносоӣ бо рафти корҳои созандагӣ бахшида ба таҷлили 26-солагии Истиқлолияти давлатӣ ва ба истифода додани якчанд иншооти гуногун ба шаҳри Қӯрғонтеппа ташриф овард.

Абдуҷаббор Раҳмонзодаро дар ин сафар раиси вилояти Хатлон Давлатшоҳ Гулмаҳмадзода, иҷрокунандаи вазифаи раиси шаҳри Қӯрғонтеппа Исмоилзода Абдуалим ва масъулини дахлдори мақомоти иҷроияи ҳокимияти давлатии вилоят ҳамроҳӣ намуданд.

Баъд аз буридани лентаи рамзӣ аз ҷониби Абдуҷаббор Раҳмонзода биноҳои нави Коллеҷи тиббии шаҳри Қӯрғонтеппа ва бинои истиқоматии панҷошиёна дар маҳаллаи “Дӯстии халқҳо” ба фаъолият оғоз намуданд.

Тавре иттилоъ дода шуд, бинои Коллеҷи тиббии шаҳри Қӯрғонтеппа дар муҳлати 2,5 сол бо арзиши зиёда аз 5 миллиону 247 ҳазор сомонӣ аз ҳисоби суратҳисоби махсуси Коллеҷ сохта шудааст. Пудратчии сохтмон Ҷамъияти дорои масъулияташ маҳдуди “Қӯрғонтеппасохтмон” буда, лоиҳакаш Ҷамъияти саҳҳомии кушодаи “Паймониншоот” мебошад.

Бинои истиқоматии панҷошиёна бошад аз тарафи соҳибкори ҷавон Файзалӣ Орифов дар масоҳати 350 ҳазор метри мураббаъ дар муҳлати 11 моҳ бо харҷи 1 миллиону 38 ҳазор сомонӣ сохта шуда, дорои шароити замонавӣ мебошад.

Ба гуфтаи масъулин дар ҳафт моҳи соли 2017 дар маркази вилояти Хатлон аз тарфи соҳибкорони ватанӣ 3 бинои 5-ошиёна, ду бинои иловагӣ барои Донишгоҳи давлатии Қӯрғонтеппа ба номи Носири Хусрав сохта шуда аст. Ҳамчунин, 23 бинои дигар дар ҳудуди шаҳр сохтумонашон бомаром идома дошта, дар арафаи ҷашни Истиқлоияти давлатӣ аз тарафи соҳибкорони ватанӣ се бинои панҷошиёна ба истифода дода мешавад.

Умед МИРЗОЕВ, “ҶТ”