Дар рӯзи якуми Фестивали ҷаҳонии ҷавонон “Navruz Youth World Festival” маросими гулчамбаргузории ҳайати иштирокчиёни Фестивал дар пояи муҷассамаи шоҳ Исмоили Сомонӣ дар шаҳри Душанбе сурат гирифт.

Зимни маросими гулчамбаргузорӣ Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва ҳайати иштирокчиёни Фестивали ҷаҳонии ҷавонон “Navruz Youth World Festival” иштирок намуда, дар пояи асосгузори давлати тоҷикон гулчамбар гузоштанд ва бо ин ба таърихи пурғановати миллати тоҷик эҳтироми худро баён доштанд.

Ёдовар мешавем, ки Фестивали ҷаҳонии ҷавонон “Navruz Youth World Festival” як чорабинии байналмилалӣ мебошад, ки ҳадафи он муттаҳид намудани ҷавонони кишварҳои гуногун дар руҳияи дӯстӣ, мубодилаи фарҳангӣ ва рушди устувор аст. Ин фестивал, ки аз анъанаҳои Наврӯз илҳом гирифтааст, рамзи навсозӣ, ягонагӣ ва сулҳ байни миллатҳо мебошад.