Нимаи дуюми имрӯз ҷавонони фаъоли шабакаҳои иҷтимоӣ дар доираи форуми ҷавонон таҳти унвони "Дарёфти роҳҳо ва абзорҳои истифодаи шабакаҳои иҷтимоӣ ба манфиатҳои миллӣ ва тарғиби арзишҳои давлатдорию давлатсозӣ " баъди боздид аз маконҳои таърихию фарҳангии ноҳияи Айнӣ ва шаҳри Панҷакент аз шаҳри Истаравшан боздид намуданд.

Дар шаҳри Истаравшан ҷавонони фаъолро дар назди қалъаи "Муғ" раиси шаҳр - Адҳам Маъмурзода ва сокинони ин макони бостонӣ бо анъанаҳои миллии тоҷикона пешвоз гирифтанд.

Баъд аз пешвозгирӣ меҳмонон аз ёдгориҳои мондагори қалъаи "Муғ"-и шаҳри Истаравшан дидан карданд.

Баъди тамошои қалъаи мазкур ҷавонон ва блогерони фаъол аз Коллеҷи ҷумҳуриявии ҳунарҳои мардумии шаҳри Истаравшан боздид карданд. Дар колеҷи мазкур иштирокчиёни форум бо ҳунарҳои зардӯзӣ, кашидадӯзӣ, сӯзанидӯзӣ, қолинбофӣ, кандакорӣ ва дигар ҳунарҳои мардумӣ шинос шуданд.

Иттилоъ дода шуд, ки дар коллеҷи мазкур аз рӯи 13 ихтисосу равияҳо ба шогирдон омӯзиш ба роҳ монда шудааст.

Дар охир ҷавонон аз мактаби варзишии ҷудои шаҳр боздид ба амал оварданд.