Дар ноҳияи Исмоили Сомонӣ соли гузашта 394 оила пош хӯрдааст, ки ин шумора нисбати соли 2020 39 адад зиёд аст. Ин нуктаро Самӣ Шариф, раиси ноҳияи Исмоили Сомонӣ 16 феврал зимни нишасти матбуотӣ ироа кард.

Сабаби зиёд шудани ҷудошавии оилаҳои ҷавонро раиси ноҳия чунин шарҳ дод, ки аксари онҳо дар синну соли барвақтӣ оила барпо кардаанд. Омили дигар бошад, ба муҳоҷирати меҳнатӣ рафтани ҷавонон аст.

Инчунин гуфта шуд, ки аз ҷониби мақомоти ҳифзи ҳуқуқ дар давраи ҳисоботӣ 596 ҷиноят ба қайд гирифта шудааст, ки аз ин ҳисоб 129 ҷинояти вазнин, 148 ҳодисаи дуздӣ, 35 ҳодисаи муомилоти ғайриқонунии маводи мухаддир ва 63 ҳодисаи қаллобӣ мебошад. Ба қавли раиси ноҳия ин омор нигаронкунанда буда, шумораи ҷиноятҳо нисбат ба соли гузашта 22 адад зиёд аст.

Самӣ Шариф дар идомаи нишаст гуфт, ки барои бартараф намудани ин мушкилиҳо аз ҷониби масъулин шурӯъ аз моҳи январи соли равон маҳалла ба маҳалла байни оилаҳои ҷавон, волидон ва муасисаҳои таҳсилоти миёнаи умумии ноҳия корҳои фаҳмондадиҳӣ ва вохӯриҳо гузаронида истодаанд.