Мақомоти вилояти Хатлон барои таъмин намудани занону бонувон бо ҷойи кор таваҷҷуҳи бештар зоҳир менамояд. Гуфта мешавад, ки имрӯз шумораи корҷӯён аз ҳисоби занону бонувон дар вилоят хеле кам ба назар мерасад. Тибқи иттилои Раёсати Агентии меҳнат ва шуғли аҳолии вилояти Хатлон дар соли 2023 дар ин минтақа 12,7 ҳазор нафар аз ҳисоби занону бонувон бо ҷойи кор таъмин гардидааст.

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста ба зарурати таъмин шудани занон ба ҷойи кор таъкид менамоянд.

- Мо тасмим гирифтаем, ки ҷалби бонувонро ба корҳои давлатӣ ва ҷамъиятӣ минбаъд низ густариш бахшем, зеро онҳо дар ҷомеаи мо қувваи бузург мебошанд ва мо ба неруву ташаббусҳои онҳо ҳамеша эътимод дорем, - таъкид намуда буданд Президенти кишвар зимни ироаи яке аз паёмҳояшон.

Аз ин рӯ, ба тамоми сохторҳои кишвар амр шудааст, ки дар кишвар барои ҷалби занон ба корҳои давлатӣ корҳои мушаххас ба сомон расонида шавад.

Ин аст, ки чанде пеш вобаста ба таъмин намудани сокинони вилояти Хатлон, аз ҷумла занон ва ҷоннок намудани кор дар ин самт Раёсати Агентии меҳнат ва шуғли аҳолӣ дар ин вилоят ҷаласаи Кумитаи ҳамоҳангсозии мусоидат ба шуғли аҳолӣ, ҳамзамон ҷаласаи Комиссияи байни идоравии танзими равандҳои муҳоҷирати вилояти Хатлон баргузор гардида, масъалаи шуғли аҳолӣ дар вилояти Хатлон баррасӣ гардид.

Дар ин ҷаласа Қурбоналӣ Қурбонзода, сардори Раёсати Агентии меҳнат ва шуғли аҳолӣ дар вилоят баромад намуда, афзуд, ки аз тарафи мақомоти Агентии меҳнат дар шаҳру ноҳияҳои вилоят 35 маротиба корҳои муздноки ҷамъиятӣ баргузор шуд. Дар ин чорабиниҳо 984 нафар шаҳрванди бекор, ки дар қайди мақомоти шуғли аҳолӣ буданд, иштирок намуданд.

Ҳамзамон манбаъ қайд кардааст, ки аз 984 нафар 425 нафараш занон мебошанд. Дар идомаи кори ҷаласа он камбудиву норасоиҳои дар самти мақомоти Агентии меҳнат ва шуғли аҳолӣ дар шаҳру ноҳияҳои вилоят ҷойдошта мавриди таҳлилу баррасӣ қарор гирифт.

ҶАЛБИ ЗАНОН БА КОРҲОИ ДАВЛАТӢ

Таъкид шудааст, ки имрӯз шумораи корҷӯён аз ҳисоби занону бонувон ба корҳои давлатӣ кам ба назар мерасад.

Барои ҷалби занон ба корҳои давлатӣ бо дастури роҳбари дастгоҳи раиси вилояти Хатлон дар тамоми шаҳру ноҳияҳои вилояти Хатлон корҳои фаҳмондадиҳӣ аз ҷониби раисони ҷамоати шаҳраку деҳот бо шаҳрвандон бештар карда мешавад.

Инчунин барои боз ҳам ҷалби сокинон ба ҷойҳои нави корӣ мақомоти вилояти Хатлон ба роҳбарони шаҳру ноҳияҳои вилоят супориш додааст, ки барои пур кардани ҷойҳои кори холӣ дар муддати як ҳафта озмун баргузор кунанд.

Ахиран бино ба иттилои маркази матбуоти раиси вилояти Хатлон дар ҷаласаи назди роҳбари дастгоҳи раиси вилоят бо мудирони шуъбаҳо, роҳбарони дастгоҳи мақомоти иҷроияи ҳокимияти давлатии шаҳру ноҳияҳо масъалаи интихоб ва ҷобаҷогузории кадрҳо барассӣ гардидааст.

Тибқи иттилои манбаъ, дар ин ҷаласа роҳбари дастгоҳи вилоят таъкид кардааст, ки дар муддати як моҳ бояд аз шаҳру ноҳияҳои вилоят, маълумот дар мавриди ташкили озмун барои қабули корҷӯён ба унвонии дастгоҳи раиси вилоят пешниҳод карда шавад.
Дар ин ҷаласа қайд гардидааст, ки айни замон дар ноҳияи Шаҳритус 39 ҷойи кории холӣ, Қубодиён 29 ҷойи кории холӣ, Панҷ 19 ҷойи кории холӣ, Носири Хусрав 17 ҷойи кории холӣ, А.Ҷомӣ 32 ҷойи кории холӣ, Вахш 42 ҷойи кории холӣ, Ҷайҳун 18 ҷойи кории холӣ, Кӯшониён 36 воҳиди кории холӣ, шаҳри Кӯлоб 22 ҷойи кории холӣ ба қайд гирифта шудааст.

“Ба роҳбарони дастгоҳи шаҳру ноҳияҳои зикршуда ва мудирони шуъбаҳои кадрҳо дастур дода шуд, ки дар давоми як ҳафта озмун барои ҷойҳои кори холӣ ташкил ва корҷӯён бо ҷойи кори доимӣ бо назардошти талаботи озмун таъмин карда шаванд”,- зикр кард манбаъ.

Бояд гуфт, ки бо дарназардошти ин ва бо мақсади амалӣ намудани ҳадафҳои Стратегияи миллии рушди Ҷумҳурии Тоҷикистон барои давраи то соли 2030 ҷиҳати то 30 фоиз расонидани хизматчиёни давлатӣ ва то 25 фоиз расонидани кадрҳои роҳбарикунанда аз ҳисоби занону бонувони лаёқатманд, дар Ҷумҳурии Тоҷикистон санадҳои барномавии дахлдор қабул карда шудааст.

Аз ҷумла, бо қарорҳои Ҳукумати Ҷумҳурии Тоҷикистон аз 30 апрели соли 2021, №167 Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021-2030 ва аз 27 апрели 2022, №204 Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони болаёқат барои солҳои 2023-2030 тасдиқ карда шудааст.

ТАЪМИНИ 66 ҲАЗОР НАФАР БО ҶОЙИ КОРИ ДОИМӢ

Қобили зикр аст, ки дар вилояти Хатлон соли 2023 дар умум 66 ҳазор нафар бо ҷойи кори доимӣ, муваққатӣ ва мавсимӣ таъмин гардидааст, ки дар қиёс ба соли қаблӣ ин рақам хеле зиёд аст.

Зикр гардид, ки аз ин миқдор ҷойи кории ташкилшуда 58 ҳазору 960 ҷой аз ҳисоби шахсони воқеӣ мебошад.

Илова бар ин, соли гузашта беш аз 13 ҳазор нафари дигар ба касбомӯзӣ фаро гирифта шуданд, ки аз ин миён 6 649 нафар тариқи ройгон дар марказҳои ин раёсат ба касбомӯзи ҷалб шудаанд.

Манбаъ афзуд, ки давоми соли 2023 ба Раёсат ва бахшҳои он дар шаҳру ноҳияҳо беш аз 38 ҳазор нафар барои пайдо кардани ҷойи кор муроҷиат карданд, ки 34,4 ҳазорашон ба қайд гирифта шуда, 25 ҳазору 700 нафарашон бо ҷойи кор таъмин гардиданд.
Бояд гуфт, ярмаркаҳои ҷойҳои корӣ ва ифтитоҳи иншооти нави иҷтимоию иқтисодӣ ва истеҳсолӣ, ки онҷо ҷойҳои корӣ таъсис дода шудаанд, ба шуғли аҳолӣ мусоидат мекунанд.

Асосан корҳои муздноки ҷамъиятӣ барои беҳтар намудани вазъи экологӣ аз ҷумла, тоза намудани минтақа, кабудизоркӯнӣ ва ободонии ҳудуд, барқарорсозии объектҳои манзилию коммуналиро дар бар мегиранд.

Қаблан коршиносон таъкид намуда буданд, ки 49,3 дарсади шаҳрвандони бекори Тоҷикистонро занон ташкил медиҳанд.