ҶОМЕА
Душанбе 10 Декабр 2018 08:52
4014
- Мо нерӯгоҳи “Роғун”-ро беҳуда “сохтмони аср” унвон накардаем. Бо бунёди ин нерӯгоҳи бузург мо на танҳо мушкилоти нарасидани барқро ба аҳолӣ ҳаллу фасл мекунем, балки барои рушди соҳаҳои мухталифи иқтисодиёт, фаъолияти муназзами корхонаҳои саноатӣ, кишоварзӣ, тавсеа ёфтани тиҷорат ва беҳтар шудани вазъи иҷтимоӣ, аз ҷумла рушди соҳаҳои маорифу тандурустӣ заминаи устувор фароҳам меорем. Ҳизби мо масъулияти бузург - сарпарастии маънавии бунёди нерӯгоҳи “Роғун”-ро бар дӯш гирифтааст ва барои пешрафти корҳои сохтмон тадбирҳои мушаххасро амалӣ мекунад. Бунёди ин иншооти муҳими аср дар ояндаи наздик ҳаёти моро комилан тағйир медиҳад. Ҳоло аз 16 ҳазор нафар мутахассисону коргарони нерӯгоҳи “Роғун” 5,5 ҳазор нафарро ҷавонони то 35-сола ташкил медиҳанд. Ду ҳазор нафар аъзои ҳизби мо дар 11 ташкилоти ибтидоии ҳизб муттаҳид шуда, дар бунёди “Роғун” саҳм гузошта истодаанд, - таъкид намуданд Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Раиси Ҳизби Халқии Демократии Тоҷикистон (ҲХДТ), муҳтарам Эмомалӣ Раҳмон зимни суханронии худ дар маҷлиси Кумитаи иҷроияи марказии ҲХДТ рӯзи 16 феврали соли 2018.

Фирдавс Мирзоев, як ҷавони фаъолест, ки роҳбарии хоҷагии сангу шағали №2 ҶСФ “Сохтмони асосӣ”-ро дар ҶСК НБО “Роғун” ба уҳда дорад. Ҳамчунин, аз соли 2012 инҷониб ӯ сардори ташкилоти ибтидоии ҲХДТ дар Раёсати корхонаҳои истеҳсолӣ мебошад. Ин ҷавони ватандӯсту меҳанпараст, ки тамоми саъю талоши худро баҳри бунёди бузургтарин иншооти аср, НБО “Роғун” равона кардааст, аз он ифтихор дорад, ки дар бунёди иншооти тақдирсози миллат, Кохи нур фаъолияти корӣ дорад:

- Имрӯзҳо ҳизбиёни мо дар сафи пеши бунёдкорони НБО “Роғун” қарор доранд, - мегӯяд ӯ. - Онҳо аз он ифтихор доранд, ки имрӯз ҲХДТ таҳти роҳбарии хирадмандонаи Пешвои муаззами миллат, муҳтарам Эмомалӣ Раҳмон сарпарастии маънавии НБО “Роғун”-ро ба уҳда дорад, ки ин ташаббус масъулияти мо аъзои ҳизбро дучанд мегардонад. ҲХДТ бо тарғибу ташвиқи мунтазами худ ҳамеша баҳри осоиштагии мардум, Ваҳдати миллӣ, сиёсати созандаю бунёдкорона, пос доштани ҳар порча замини Ватан, сулҳу субот, ҷаҳонбинии васеъ, тарбияи ҷавонон кӯшиш менамояд.

Фирдавс аз он ифтихор дорад, ки маҳз бо иқдоми Пешвои миллат, муҳтарам Эмомалӣ Раҳмон соли 2017 ба ҷавонон бахшида шуда буд. Ӯ мегӯяд, ин ташаббуси Сарвари давлатро тамоми ҷавонони кишвар, бахусус ҷавонони Кохи нур бо хушнудӣ истиқбол намуда, ҳамеша иброз менамоянд, ки мо – ҷавонон ҷонибдори сиёсати сулҳпарварона ва хирадмандонаи Пешвои миллатем!

Имрӯзҳо дар баробари Фирдавс тамоми ҷавонмардону ҷавонзанони НБО “Роғун”-ро тавонмардиҳои Пешвои миллат рӯҳу илҳоми тоза мебахшад ва шуҷоату матонати беҳамтои онҳо ин иншооти бузургу тақдирсоз ҳамто надорад. Коргарону мутахассисон, алалхусус ҷавонон, бо майлу рағбати том корҳои сохтмону васлгариро анҷом медиҳанд ва хуб дарку эҳсос менамоянд, ки ҳар қадар ин иншооти армоншикан зудтару хушсифат ба сомон расад, ҳамон қадар сатҳу сифати рӯзгору зиндагии худ ва ҳамдиёронашон беҳтар ва Тоҷикистони азиз шукуфотару пурғановат хоҳад шуд. Кору пайкори имрӯз дар НБО “Роғун”, бахусус дар бунёди сарбанд, майдони азму разми ҳақиқиро мемонад. Он рӯзи мубораку ояндасоз - тағйир додани маҷрои дарёи Вахш, ки бо ширкати мустақиму техникии Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон сурат гирифт, солҳову қарнҳо дар ёдҳову хотираҳо ва шаҳкитоби таърих боқӣ хоҳад монд. Ва ҳидоятҳои Ҷаноби Олӣ ба бунёдгарони НБО “Роғун”, ки “маҷрои дарёро тағйир додам, боқимонда ҳамаи корҳо ба уҳдаи шумо, кор дар бунёди сарбанд бояд ягон соат қатъ нагардад”, маҳаки фаъолияти бунёдгарон, бахусус ҷавонон шудааст. Аз он лаҳзаҳои тақдирсоз муддати на чандон тӯлоние сипарӣ шуда бошад ҳам, имрӯз дар нерӯгоҳ корҳои зиёду назаррас дар бунёди сарбанди баландтарини иншооти гидроэнергетикии дунё бо қомати лоиҳавии 335 метр ба иҷро расидаву бо суръату равнақи тоза идома дорад.

Дигар чизе, ки мо дар аввал ёдоварӣ кардем, ин ба таъкиди Пешвои миллат саҳми 16 ҳазор нафар мутахассисону коргарон дар бунёди нерӯгоҳ “Роғун” мебошад, ки аз ин миён 5,5 ҳазор нафарро ҷавонони то 35-сола ташкил медиҳанд. Ҳамчунин, бахшидани рӯҳу илҳоми тоза ва нерӯву қувваи нав ба онҳо аз ҷониби сарпарасти маънавии НБО “Роғун” – ҲХДТ мебошад, ки имрӯз ду ҳазор нафар аъзои ҳизби шуда, дар 11 ташкилоти ибтидоии ҳизб муттаҳид ва дар бунёди “Роғун” саҳм гузошта истодаанд.

Дар воқеъ Ҳизби халқии демократии Тоҷикистон ҳанӯз аз рӯзҳои аввали таъсисёбиаш баҳри зиндагии ободу осудаи мардум талош намуда, бо татбиқи ҳадафҳои барномавии худ дар таҳкими ҷомеаи шаҳрвандӣ, ваҳдати миллӣ, худшиносиву худогоҳӣ пайваста саҳм гузошта, шаҳрвандонро ба корҳои созандагию бунёдкорӣ ва ободии мамлакат сафарбар менамояд. Кумитаи иҷроияи ҲХДТ дар ҶСК НБО “Роғун” фаъолияти худро дар асоси Оиннома, Барномаи ҲХДТ, Қонуни Ҷумҳурии Тоҷикистон “Дар бораи ҳизбҳои сиёсӣ”, дастуру супоришҳои Асосгузори сулҳу ваҳдати миллӣ - Пешвои миллат, Раиси ҲХДТ, муҳтарам Эмомалӣ Раҳмон, амру фармонҳои Кумитаи иҷроияи марказии ҲХДТ ва Кумитаи иҷроияи ҲХДТ дар шаҳри Роғун ба роҳ мондааст. Ҳамаи аъзои ҳизб ҳадафҳои асоии ҲХДТ ва сиёсати имрӯзаи давлатро бо роҳбарии Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон дастгирӣ менамоянд ва дар ин замина кору фаъолияти худро дар бунёди Кохи нур – НБО “Роғун” пеш бурда истодаанд.

Чуноне Абдулаҳадзода Сайдулло, раиси Кумитаи иҷроияи ҲХДТ дар НБО “Роғун” иброз дошт, Кумитаи иҷроияи ибтидоии ҲХДТ дар ҶСК НБО Роғун” ҳамчун ташкилоти ҷамъиятӣ рисолати хешро ба сифати ҳизби созандаю бунёдкор дар иншооти тақдирсози миллат - НБО “Роғун” дар ин марҳилаи таърихӣ аз ҳарвақта дида, бештару амиқтар дарк намуда, ҷиҳати татбиқи сиёсати дурандешонаи Раиси ҲХДТ, муҳтарам Эмомалӣ Раҳмон тадбирҳои амалиро роҳандозӣ намуд:

- Имруз бо қаноатмандӣ метавон иброз намуд, ки саҳми аъзоёни Ҳизби халқии демократии Тоҷикистон дар таҳким ва устувории ваҳдату ягонагии миллӣ, ҳамбастагию якдигарфаҳмӣ, сулҳу субот ва рушди соҳаҳои мухталифи хоҷагии халқ самарабахш арзёбӣ гардидааст, - таъкид намуд ӯ.

Соли сипаригардида, ки ҳоло мо аз он ба некӣ ёдовар мешавем, барои ҷомеаи мо соли бобаракат ва таърихӣ ба ҳисоб рафта, санаю руйдодҳои муҳиме ҷашн гирифта шуд, ки ҷиҳати боло бурдани обрӯю эътибори кишвари соҳибистиқлоламон дар арсаи байналмилалӣ мусоидат намуданд. Аз ҷумла бо пешниҳоди Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон эълон гардидани соли 2017 “Соли ҷавонон”, Ҷашни байналмилалии “Навруз-2017”, 20-солагии Ваҳдати миллӣ, 10-солагии қабули Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон”, 26-солагии Истиқлолияти давлатии Ҷумҳурии Тоҷикистон, 23-солагии Конститутсияи Ҷумҳурии Тоҷикистон, 25-солагии Иҷлосияи таърихии 16-уми Шӯрои Олии Ҷумҳурии Тоҷикистон, Рӯзи Президент, Рӯзи Парчами давлатии Ҷумҳурии Тоҷикистон ва ҳамчунин 23-солагии таъсисёбии ҲХДТ мебошанд, ки дар ин самт аз тарафи Кумитаи иҷроияи ибтидоии ҲХДТ дар ҶСК НБО “Роғун” нақшаи чорабиниҳо таҳия гардида, тибқи нақша дар ташкилоту қитъаҳои корӣ вохӯрию мулоқотҳо баргузор карда шуданд. Масъулини Кумитаи иҷроияи ибтидоии ҲХДТ дар ҶСК НБО “Роғун” бо мақсади баррасии Паёми Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон тибқи нақша дар ташкилоту китъаҳои алоҳидаи корӣ зиёда аз 17 вохӯрию мулоқотҳоро баргузор намуда, нуқтаҳои асосии Паёми Президентро оиди сиёсати дохиливу хориҷии Ҷумҳурии Тоҷикистон ба саҳми иштирокчиён расонида шуд. Аҳли муҳандисону бунёдкорони НБО “Роғун” Паёми Президентро бо шукргузорӣ аз фазои сулҳу ваҳдати миллӣ ва руҳияи баланди ватандӯстӣ шунида, ҳамовозии гарми худро иброз намуданд.

Тибқи дастуру супоришҳои Пешвои миллат, Раиси ҲХДТ муҳтарам Эмомалӣ Раҳмон рӯзи 5 январи соли сипаришуда вазорату идораҳо ташкилоту муассисаҳои ҷумҳурӣ вазифадор шудаанд, ки бо навбат ҳайати кормандони худро ба шаҳри Роғун сафарбар намоянд, то ин ки онҳо бо ҷараёни корҳои сохтмонӣ аз наздик шинос шуда, бо коргарони НБО “Роғун” мулоқоту вохӯриҳо гузаронанд. Дар ин замина, рӯзи 11 январи соли 2017 таҳти роҳбарии аъзои Кумитаи иҷроияи марказии ҲХДТ Назрӣ Асадзода, раиси Кумитаи иҷроияи ҲХДТ дар шаҳри Ҳисор Фаррух Аловидинов бо мақсади шиносоӣ аз рафти корҳои сохтмонӣ бо 47 нафар ҷавонон, гирандагони стипендияи президентӣ ба НБО “Роғун” ташриф оварда, дар самти корҳои ҳизбӣ аз Кумитаи иҷроияи ибтидоӣ дидан намуда, ҷиҳати пешрафти корҳои созандагию бунёдкорӣ дар НБО “Роғун” ба бунёдкорони ин иншоот изҳори сипос намуданд. Илова бар ин, дар асоси дастуру супоришҳои Пешвои миллат, Раиси ҲХДТ, муҳтарам Эмомалӣ Раҳмон дар моҳи апрели соли 2017 гурӯҳҳои кории Дастгоҳи иҷроияи Президент, Кумитаи Иҷроияи Марказии ҲХДТ, Вазорати фарҳанги Ҷумҳурии Тоҷикистон, олимону адибон 8 маротиба тибқи нақшаи корӣ бо бунёдгарони Кохи нур силсилаи суҳбату вохӯриҳоро дар мавзӯи Нақши Пешвои миллат, муҳтарам Эмомалӣ Раҳмон дар бунёди иншооти тақдирсози миллат НБО “Роғун”, соли 2017- “Соли ҷавонон”, 20-солагии Ваҳдати миллӣ, Даҳсолаи байналмилалии амал “Об барои рушди устувор 2018-2028” баргузор намуда, дар ин раванд барномаҳои фарҳангию фароғатӣ бо иштироки ҳунармандони шинохтаи кишвар ташкил карда шуд.

Ба таъкиди Абдулаҳадзода Сайдулло, раиси Кумитаи иҷроияи ҲХДТ дар ҶСК НБО “Роғун” соли 2017 барои аъзо ва ҷонибдорони ҲХДТ, бунёдкорони НБО “Роғун” соли хотирмону фаромӯшнашаванда буд.

- Дар ин соли муборак сафари кории Пешвои миллат, Раиси ҲХДТ муҳтарам Эмомалӣ Раҳмон ба НБО “Роғун” сурат гирифт. Рӯзи 10 майи соли 2017 Президенти кишварамон дар доираи сафари кории худ ба НБО “Роғун” бо ҷараёни корҳои сохтмону васлгарӣ аз тамоми қитъаҳои корӣ шинос шуда, ба ҳамаи бунёдкорони иншооти тақдирсоз барои заҳмати содиқона ва азму субот баҳри бардоштани пешдарғот ва вусъати корҳои созандагӣ изҳори сипос карданд. Дастуру супоришҳои Пешвои миллат, Раиси ҲХДТ, муҳтарам Эмомалӣ Раҳмон аъзо ва ҷонибдорони ҲХДТ, бунёдкорони НБО “Роғун”-ро ба корнамоиҳои нави меҳнатӣ рӯҳбаланд намуд,- гуфт ӯ.

Дар идомаи боздиди намояндагони мақомоту идораҳои давлатӣ, бо назардошти амалӣ намудани дастуру супоришҳои Пешвои миллат, ҳамчунин гурӯҳи кории Мақомоти иҷроияи маҳаллии ҳокимияти давлатии шаҳри Ваҳдат ва Мақомоти иҷроияи маҳаллии ҳокимияти давлатии ноҳияи Файзобод бо раванди корҳои сохтмонии НБО “Роғун” дар моҳи ноябри соли 2017 шинос шуда, дар бозгашт ба мардуми маҳалли хеш ҳадафҳои созандаву бунёдкоронаи Ҳукумати ҷумҳуриро ҷиҳати таъмини истиқлолияти комили энергетикии кишвар ва рӯзгори шоистаи мардум, ки он таҳти роҳбарии Пешвои миллат, муҳтарам Эмомалӣ Раҳмон сурат гирифта истодааст, расониданд.

Ба таъкиди Абдулаҳадзода Сайдулло, ҷиҳати пешравии корҳои ҳизбӣ ва ҳавасмандгардонии аъзои ҳизб дар соли 2017 аз тарафи Иттиҳодияи иттифоқҳои касабаи НБО “Роғун” ба 11 нафар раисони ташкилотҳои ибтидоӣ ва 11 нафар шахсоне, ки дар корҳои ҳизб саҳми босазои худро гузоштаанд, ки ҳамаги аз ҳисоби ҷавонон мебошанд, кӯмаки молиявӣ ба маблағи 2600 сомонӣ расонида шуда, аз тарафи ташкилотҳои ибтидоӣ 83 нафар кормандони фаъол ба сафи ҳизб шомил карда шудаанд.

- Имрӯз кормандони НБО “Роғун”, хосса ҷавонон бояд ифтихор намоянд, ки ҲХДТ сарпарасти маънавии НБО “Роғун”-ро ба уҳда дорад. Мо медонем, ки соли равон аз тарафи Пешвои миллат “Соли рушди сайёҳӣ ва ҳунарҳои мардумӣ” дар кишвар эълон гардидааст. Ҷавонони коргар дар баробари бунёди нерӯгоҳ, ҳамзамон бо ҳисси баланди ватандӯстӣ, ифтихори миллӣ корҳои созандагию бунёдкориро дар ин самт низ ба сомон мерасонанд. Ҷавонон имрӯз бо кӯшишу талоши пайваста барои расидан ба истиқлолияти комили энергетикӣ тавассути сохтмони нерӯгоҳи “Роғун” корҳоро дар сатҳи баланд ба роҳ мондаанд, - бо хушнудӣ афзуд Абдулаҳадзода Сайдулло, раиси Кумитаи иҷроияи ҲХДТ дар ҶСК “Роғун”.

Азму разми ҷавонони қавирӯҳу қавипайкар дар паҳлӯи мардони таҳамтан дар ин майдони набард - нерӯгоҳи “Роғун” танин андохтаву қалбҳоро тасхир мекунад, ба дидаҳо нур ва ба дилҳо сурур мебахшад.

Гар марди раҳнавардӣ, гирди даҳон бигардӣ,
Донӣ сарои мардӣ бошад сарои Роғун.

Манзараҳои равонсозу тавонбахши мардистони “Роғун” эътимоду эътиқодро ба ояндаи наздики нурбору нурафшони Тоҷикистони азиз фузунтару шуълаи умедвориҳоро фурӯзонтар месозад.

Мешавад Роғуни мо дунёи нурободи мо,
Қиссаи Роғуни мо шаҳномаи даврон шавад!

Тоҷикистон кишвари ҷавон асту беш аз ҳафтод фисади аҳолияшро ҷавонони бонангу номус ташкил медиҳад. Пас, ҳар яки мо – ҷавононро мебояд дар зери сиёсати ҷавонпарваронаи Пешвои миллат фаъолияти худро ба роҳ монда, саҳми хешро ҷиҳати амалӣ гардидани орзую мақсадҳои накӯи Ҳукумату давлат гузорем. Зеро ояндаи дурахшону шукуфони ин меҳани биҳиштосо, ки ном онро Тоҷикистон аст, маҳз аз фаъолияти пурсамари имрӯзи мо вобаста аст.

Беҳрӯз ХОЛМУРОДОВ, Хуршед МАВЛОНОВ, “ҶТ”, Душанбе–НБО “Роғун”–Душанбе

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

Декабр 2018 c.