14-уми ноябр бо ташаббуси Бахши кор бо ҷавонон ва варзиши ноҳияи Исмоили Сомонии шаҳри Душанбе бахшида ба 25-солагии Иҷлосияи XVI-уми Шӯрои Олӣ ва Рӯзи Президенти Ҷумҳурии Тоҷикистон конфронс доир гардид.

Дар он Самӣ Шариф Ҳамид, Мирзозода Иброҳим, сардори Раёсати ҷавонони шаҳри Душанбе, Розиқзода Дилошӯб, иштирок ва суханронӣ намуданд.

Самӣ Шариф Ҳамид, раиси ноҳияи И. Сомонӣ, аз корнамоиҳои Пешвои миллат дар барқарорсозии сулҳи тоҷикон бо ифтихормандӣ ёд карда, хизматҳои эшонро дар таҷрибаи ҷаҳонӣ беҳамто арзёбӣ намуд: “Пешвои миллат аз соли 1992 то 1995 дар утоқи кориашон ҳам кор ва ҳам зиндагӣ кардаанд, то давлати тоҷиконро дар арсаи ҷаҳонӣ муаррифӣ карда бошанд”.

Розиқзода Дилошӯб, намояндаи Кумитаи кор бо ҷавонон ва варзиши мамлакат, иброз дошт, “Шиори “Президенти мо – ифтимхори мо” худ аз он дарак медиҳад, ки Пешвои миллат дар ҳақиқат раҳнамову раҳкушои халқи тамаддунофари тоҷик аст. Ситоишу дӯстдориҳои мардум нисбати ин марди шариф натиҷаи заҳматҳои шабонарӯзии ӯст”.

Дар баробари конфронс инчунин намоиши китобҳои Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон ба намоиш гузошта шуд. Дар фаровард аз ҷавонон ва иштирокчиёни конфронс даъват ба амал оварда шуд, ки дар рушди кишвар саҳмгузор бошанд, то ояндаи дурахшонеро барои худ созанд.