ҶОМЕА
Чоршанбе 17 Июл 2024 07:15
1430
Либоси мактабӣ дорои хусусияти хос буда, дар инкишофу такмили тарбияи ахлоқӣ ва маънавии хонандагон ва ифтихори миллиашон нақши бузург мебозад. Либоси мактабӣ дар ниҳоди хонандагон ҳисси зебоипарастӣ, озодагии хулқу атвори ҳамидаи инсониро ҷой намуда, онҳоро водор месозад, ки хушрафтор, хушбин ва боинтизом бошанд.

Соли 2007 аз ҷониби Вазорати маориф “Дастурамали либосҳои тавсиявии хонандагони мактабҳои таҳсилоти миёнаи умумӣ” пешниҳод шуд. Дастурамали тасдиқшуда дар байни хонандагон баробариро таъмин менамояд. Ҳамаи хонандагон, чи аз оилаи камбизоат бошад, чи аз хонаводаи сарватманд, либоси ягона ба бар менамоянд.

Имрӯз дар тамоми корхонаҳои дӯзандагии шаҳри Душанбе дӯхтани либосҳои мактабӣ бомаром идома дорад. Бо наздик омадани соли нави хониш масъалаи иҷрои нақшаи истеҳсоли либоси ягона дар пешорӯи ҳамаи корхонаҳои дӯзандагӣ қарор гирифтааст. Корхонаҳои ҶСК “Гулистон”, ҶДММ “ИИ нассоҷии тоҷик”, “Ёқут – 2000” аз зумраи корхонаҳоеанд, ки барои мактаббачагон либоси шинами мактабӣ омода мекунанд. Барои таъмин намудани мактаббачагон бо либоси ягонаи мактабӣ масъулини ин корхонаҳо дар назди мактабҳое, ки шартнома доранд, нуқтаи фурӯши либосро ба роҳ мондаанд.

Масъули корхонаи ҶСК “Гулистон” иброз намуд, ки маҳсулоти истеҳсолнамудаи онҳо сифати хуб дошта, ба стандарти давлатӣ ҷавобгӯ аст ва нисбат ба бозор 40% арзон мебошад. Аммо сокини пойтахт Маҳмадалиева Гулрухсор дар суҳбат бо мо иброз дошт, либосҳои мактабие, ки дар корхонаҳои дӯзандагӣ истеҳсол мешаванд, сифати паст дошта, талаботи мардумро қонеъ намегардонанд ва нархаш ҳам нисбат ба бозор чандон фарқият надорад.

Сокини дигари пойтахт, апаи Сайлӣ, ки фарзандонаш дар мактаби №91 таҳсил менамоянд, иброз дошт, либосҳое, ки мо аз мактаб харидорӣ менамоем, зуд аз истифода мебарояд. Ҳар рӯз дарзаш меканад, ки ин аз сифати пасти онҳо дарак медиҳад. Барои ҳамин аксари волидон либосҳои мактабиро аз бозору мағозаҳо харидорӣ менамоянд.

Шояд бошанд корхонаҳое, ки дастурамалро дастак карда, маҳсулоти бесифатро пешкаш намоянд. Аммо роҳбарони мактабҳо бояд бо корхонаҳое шартнома банданд, ки маҳсулоти босифат истеҳсол менамоянд. Корхонаҳои дӯзандагӣ низ бояд на ба хотири иҷрои нақша кор кунанд, балки маҳсулоти хубу босифат истеҳсол намоянд, то волидони хонандагон аз он ки аз маҳсулоти онҳо харидорӣ кардаанд, пушаймон нашаванд.

Наргис БЕРДИЕВА,
донишҷӯи ДМТ, коромӯзи “ҶТ”

Эзоҳи худро нависед



Рамзҳо дар расм