Бино ба иттиллои Зувайдзода Маҳмадсаид, раиси Кумитаи меъморӣ ва сохтмони назди Ҳукумати кишвар майдони "Истиқлол"- и шаҳри Душанбе дар арафаи ҷашни 31 - солагии Истиқлоли давлатии Ҷумҳурии Тоҷикистон ба истифода дода мешавад.

Ба таъкиди ӯ чорабиниҳои фарҳангӣ бахшида ба ин ҷашн дар ин майдон доир хоҳад шуд.

Ёдовар мешавем, ки майдони “Истиқлол” дар ҳудуди хиёбони Рӯдакӣ, кӯчаҳои Саид Носир, Ҳабиб Аҳрорӣ ва Ойгули пойтахт воқеъ буда, масоҳати он 30 гектарро ташкил медиҳад. Ин иншооти муҳташам аз минбар, дарвозаи марказӣ ва дарвозаҳои шимолию ҷанубӣ, фаввораҳо, шаршара, деворнигора, айвончаҳо, майдони баргузории роҳпаймоиҳо, гулгашт, ҳавзҳои декоративӣ бо наҳрҳо, таваққуфгоҳо ва ғайра иборат мебошад.