Имрӯз дар толори Маркази ҷумҳуриявии иммунопрофилактикаи Вазорати тандурустӣ ва ҳифзи иҷтимоии аҳолии кишвар мизи мудаввар оид ба ворид намудани вояи дуюми эмкунии (ваксинаи) ғайрифаъоли зидди бемории фалаҷ (ИПВ – 2) доир гардид.

Дар он А. Амирзода – муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон, Виктор Олшавски – сардори намояндагии Созмони умумиҷаҳонии тандурустӣ дар Ҷумҳурии Тоҷикистон, Осама Маккавӣ – сардори намояндагии Хазинаи кӯдакони Созмони Миллали муттаҳид дар Ҷумҳурии Тоҷикистон ва кормандони соҳа иштироку суханронӣ намуданд.

А. Амирзода чорабиниро ҳусни оғоз бахшида, иброз намуд: “Дар мубориза бар зидди бемории фалаҷ Вазорати тандурустӣ ва ҳифзи иҷтимоии аҳолии Ҷумҳурии Тоҷикистон баробари дигар давлатҳо як қатор чорабиниҳои муҳимро баҳри амалӣ гардонидани нақшаи стратегӣ оид ба барҳам додани бемории фалаҷ ва амалӣ намудани марҳилаи хотимавӣ дар давоми солҳои охир ба анҷом расонидааст. Аз ҷумла, соли 2016 аз истифодаи ваксинаи севалента ба ваксинаи дувалента дар саросари ҷумҳурӣ гузаштем. Соли 2018 вояи якуми ваксинаи ғайрифаъолкардашудаи зидди бемории фалаҷ тавассути роҳи тазриқӣ (ИПВ) ба тақвими миллии Ҷумҳурии Тоҷикистон ворид карда шуд. Бо шарофати воридкунии ваксинаи ҳаётан муҳими зидди бемории фалаҷ ва гузаронидани чорабиниҳои эмкунии оммавӣ то имрӯз ҷумҳурӣ мақоми худро ҳамчун давлати озод аз бемории фалаҷ нигоҳ дошта истодааст”.

Инчунин дар рафти мизи мудаввар Виктор Олшавски – сардори намояндагии Созмони умумиҷаҳонии тандурустӣ дар Ҷумҳурии Тоҷикистон ва Ф. Саидзода – директори Маркази ҷумҳуриявии иммунопрофилактика доир ба ин масъала андешаҳои худро баён доштанд.

Дар охир нафарони масъул ба суолҳои рӯзноманигорон посухҳои мушаххас доданд.

Таҳмина ЮСУФӢ, “ҶТ”