ҶОМЕА
Шанбе 13 Июл 2024 08:54
10451
Шоми 22-юми июн барои мухлисони варзиши тоҷик рӯзи бисёр ҳассос ва деринтизор аст. Зеро дар ин шом ду варзишгари кишвар – Муин Ғафуров ва Муҳаммад Наимов дар ташкилоти UFC рақобатҳои навбатии худро доир хоҳанд кард. Ҳамагон бесаброна мунтазири фарорасии ин рӯз буда, боварӣ доранд, ки варзишгарони кишвар ҳарифони худро шикаст дода, бо натиҷаҳои назаррас ба кишвар хоҳанд омад. Ин ҷо дар мавриди нафаре ҳарф хоҳем зад, ки яке аз варзишгарони чеҳраошнои кишвар аз намуди муҳорибаҳои омехта мебошад ва ӯ Муин Ғафуров аст.

ДИЛБАСТАГӢ БА ФУТБОЛ ВА ТАМРИН ДАР САМБОИ МУҲОРИБАВӢ

Муин Ғафуров соли 1996 дар шаҳри Душанбе ба дунё омадааст. Ин варзишгари номошнои меҳан аз овони хурдсолӣ ба варзиш шавқу ҳаваси зиёд дошт. Аммо бар хилофи касби интихобнамудаи худ ӯ дар ҷодаи варзиш бештар худро ҳамчун футболбоз тасаввур мекард. Мехост дар оянда ба ҳайси футболбоз дар мусобиқаҳои бузурги сатҳи ҷаҳонӣ иштирок намуда, бо чеҳраҳои саршиноси олами футбол рӯ ба рӯ гардад. Ин буд, ки аз овони наврасӣ ҳамеша дар дохили майдони футбол дар ҳоли тамрину машғули бозии футбол буд. Аммо бо вуҷуди меҳри зиёд нисбат ба футбол ӯ майл намуд ҷониби варзиши самбои муҳорибавӣ ва хост худро дар ин ҷодаи варзиш низ санҷад. Ин шавқ дар дили ӯ яку якбора ба миён наомад. Ӯро барои ба ин навъи варзиш пайвастан, бештар аз ҳама тағо ва минбаъд мураббиаш Аҳтам Хокиров ташвиқ мекард. Ин нуктаро худи Муин Ғафуров низ дар суҳбатҳояш борҳо қайд кардааст. Ӯ мегӯяд, вақте дар майдони футбол тамрин мекард, медид, ки тағояш бо чанде аз наздикони худ дар назди майдони футбол ба тамрини самбои муҳорибавӣ машғул буд.

“Вақте машқи онҳоро тамошо мекардам, дар дилам нисбат ба ин навъи варзиш меҳр пайдо мешуд. Бо вуҷуди ин, ба назди онҳо намерафтам ва ба футбол машғул мешудам. Рӯзе тағоям Аҳтам Хокиров маро назди худ даъват кард ва гуфт, ки “биё ба варзиши самбои муҳорибавӣ машғул шав. Бо мо тамрин намо, шояд ин навъи варзиш ба ту писанд ояд”. Ман ҳамон рӯз рафтам ва бо онҳо машғули тамрин гаштам”, - мегӯяд қаҳрамони мо.

Аҳтам Хокиров низ мегӯяд, Муин дар утоқи худ расми футболбозони дӯстдоштаашро овезон карда буд.

“Дар утоқи Муин акси футболбозони шинохта, аз қабили Роналдо, Кака ва дигарон овезон буд. Ӯ футболро дӯст медошт. Аммо барои ин ӯро ба самбои муҳорибавӣ даъват кардам, ки вақте баҳор фаро мерасид ва ҷашни Наврӯз баргузор мегашту мусобиқаҳои гӯштин ташкил мешуд, Муин ҳатман дар чунин мусобиқот ширкат мекард”, -мегӯяд Аҳтам Хокиров.

Мураббии ӯ Аҳтам Хокиров низ аз будани маҳорати гӯштин дар вуҷуди Муин ба хубӣ огоҳӣ дошт ва кӯшиш кард, то ӯро ба варзише раҳнамун созад, ки дар он бештар рушд карда, ба натиҷаҳои хубтар ноил гардад.

ҒОЛИБИЯТИ АВВАЛИН ВА ТАҒЙИРИ ОРЗУИ КӮДАКӢ

Бо вуҷуди ин, баъзан Муинро орзуи хурдсолӣ ором намегузошт ва ӯ аз тамрин дар назди тағо ва мураббии худ фирор карда, ба майдони футбол мерафту ба бозии футбол машғул мешуд. Аммо гузашти чанд вақт аз тамринҳо дар намуди варзиши самбои муҳорибавӣ ба Муин имкон дод, то дар мусобиқае миёни тамринкунандагони толори варзишие, ки ӯ низ он ҷо тамрин мекард, иштирок карда, ба гирифтани мақоми дуюм даст ёбад. Ин натиҷа барои Муин дастоварди назаррас буд ва бо нишон додани чунин натиҷа мақсаду маром ва ҳадафи Муин ба куллӣ тағйир ёфт. Ҳамакнун, ӯ ҳаматарафа худро ба намуди варзиши самбои муҳорибавӣ бахшид.

ГИРИФТАНИ УНВОНИ ҚАҲРАМОНӢ ВА ВОХӮРӢ БО ҲАБИБ

Пас аз талошу тамринҳои зиёд ва кӯшишу заҳматҳо ба қаҳрамони мо имкон даст дод, то дар мусобиқаҳои сатҳи ҷаҳонӣ иштирок намояд. Муин соли 2013 дар Чемпионати ҷаҳон оид ба самбои муҳорибавӣ дар Маскав иштирок кард. Он сол ӯ ҳамагӣ 17 сол дошт. Муин дар ин рақобат маҳорати баланд нишон дода, бо шикаст додани ҳарифони худ ба гирифтани унвони қаҳрамони ҷаҳон оид ба самбои муҳорибавӣ даст ёфт.

Ҳамин сол, ӯ инчунин дар яке аз мусобиқаҳо бо Ҳабиб Нурмагомедов, варзишгари машҳур ва шинохтаи сатҳи ҷаҳонӣ аз наздик вохӯрд. Ин дидор замоне ба миён омад, ки ҳоло Ҳабиб дар корномаи варзишии худ унвони қаҳрамонӣ надошт ва чун дигар варзишгарон шуҳраташ миёна буд. Аммо вохӯрӣ бо Ҳабиб барои Муин хуш анҷом наёфт. Зеро Муин аз Ҳабиб хост, то бо ӯ акс гирад, аммо Ҳабиб розӣ нашуд. Аз он рӯз ба баъд Муин ҳамеша дар мақсади он буд, то расад рӯзе, ки ӯ бо Ҳабиб дар майдон вориди рақобат гардад.

“Ман он вақт ҳамагӣ 16 ё 17 сол доштам. Ҳабиб низ ягон унвони қаҳрамонӣ надошт. Бо дидани рақобатҳои ӯ аз дил гузаронидам, ки шояд дар оянда ин нафар қаҳрамони вазни худ гардад. Аз ҳамин сабаб хостам бо ӯ акс гирам. Аммо ӯ барои акс гирифтан наомад. Аз ҳамон рӯз инҷониб қарор додам, агар дар як ринг бо Ҳабиб Нурмагомедов бо ҳам рақобат намоем, то охир ё ба истилоҳ “то мурдан” бо ӯ мубориза хоҳам бурд”, - гуфтааст дар яке аз мусоҳибаҳои худ Муин Ғафуров.

ШАРТНОМА БО СОЗМОНИ ONE FIGHTING CHAMPIONSHIP TEAM

Заҳмату талошҳои пайвас-таи Муин сабаб шуд, то соли 2016 бо ташкилоти бонуфузи ONE Fighting Championship Team шартнома бандад. Пас аз пайвастан ба ташкилоти мазкур Муин ҳамакнун дар мусобиқаҳои ҷиддитар баромад мекард. Ӯ дар ин ташкилот ба ҳайси варзишгари муҳорибаҳои омехта шомил шуд ва баромади пурсамар низ дошт. Дар ин ташкилот чандин пирӯзиро ба даст овард. Ӯ тавонист бо муҳорибаҳои хуби худ, ки дар ташкилоти мазкур баргузор мекард, назари роҳбарияти ташкилоти бонуфузи ҷаҳонии UFC-ро ҷалб созад. Дар ин миён муддати зиёда аз як сол ба Муин аз ҷониби ташкилоти ONE Fighting Championship Team ягон рақиб дода нашуд. Ва ин омил бар зарари Муин анҷом меёфт. Зеро ӯ вазни худро гум мекард. Бинобар ин, бо ташкилоти UFC шартнома баст. Баъд аз бастани шартнома ба Муин аз ҷониби ташкилоти UFC мусобиқа низ таъйин гардид. Аммо пас аз таъйини мусобиқа ташкилоти ONE Fighting Championship Team ба рақобати мазкур мудохила кард ва иҷозат надод, то Муин дар ташкилоти UFC баромад намояд.

ШОМИЛШАВӢ БА UFC

Пас аз чанд сол, аниқтараш соли 2023 ба Муин имкон даст дод, то орзуи деринаи худро амалӣ гардонад. Размикори варзидаи тоҷик Муин Ғафуров дар қувваозмоии асосии мусобиқаи LFA 144, ки дар шаҳри Су-Фоллси Амрико дар Дакотаи Ҷанубӣ сурат гирифт, бо Диего Силва аз Бразилия сабқат кард. Ӯ бо шикаст додани ҳарифи бразилии худ ба тариқи нокаути техникӣ қаҳрамони LFA гашт. Қаҳрамонӣ дар LFA ба Муин имкон дод, то ба ташкилоти UFC роҳ ёбад. Бо ҳамин Муин сеюмин варзишгар аз Тоҷикистон шуд, ки ба ташкилоти бонуфузи UFC роҳ меёбад.

НОКОМИҲО ДАР UFC

Дар ин ташкилот бахт ба рӯи Муин нахандид. Ӯ дар ин ташкилот то ба ҳол ду рақобат анҷом дода, дар ҳардуи он мағлуб шудааст. Рақиби аввалини Муин дар ташкилоти UFC Ҷон Кастанедаи амрикоӣ буд, ки варзишгари мо дар муқобили ӯ мувоҷеҳи шикаст шуд. Дар рақобати дуюм бошад, Муин аз Саид Нурмагомедови рус бо усули буғӣ кардан, шикаст хӯрд.

Ҳамакнун, ин варзишгари меҳан рӯзи 22-юми июн рақобати навбатии худро муқобили Кюнг Ҳо Канг дар Арабистони Саудӣ баргузор менамояд. Мо дар рақобати мазкур ба Муин барор мехоҳем ва умедворем, ки бо шикаст додани рақиби худ тавонад ба шикастҳои худ дар ташкилоти UFC нуқта гузошта, дар мусобиқаҳои навбатӣ парчамбардори меҳан бошад.

Бояд гуфт, ки Муин дар чанд навъи варзиш баромад кардааст. Ӯ соли 2014 пас аз талошҳои зиёд қаҳрамони ҷаҳон дар варзиши ММА аз навъи WKA гаштааст. Соли 2018 ӯ дар як мусобиқаи ҷудо дар ИМА ғолиб омадааст. Ҳамчунин, дорандаи унвони қаҳрамони ҷаҳон аз намуди варзиши грэпплинг (FILA) низ мебошад.

Ҳошим РАҲМАТУЛЛОЕВ, “ҶТ”

Эзоҳи худро нависед



Рамзҳо дар расм