Хадамоти зиддинҳисорӣ баланд шудани нархи ширкатҳои мобилиро рад карда, гуфт, ки баръакс сол аз сол нархи хизматрасониҳои ширкатҳои мобилӣ поён шуда истодаанд.

Ин нуктаро Муминзод Абдулмаҷид, сардори Хадамоти зиддинҳисорӣ, 15 июл, зимни нишасти хабарӣ иброз намуда, ӯ дар ҷавоб ба суоли рӯзноманигори рӯзномаи “Ҷавонони Тоҷикистон”, ки “Чаро дар баробари аз байн бардоштани нархи хизматрасонии 80 дирамаи ҳар моҳа яку якбора нархи тамоми хизматрасониҳои мобилӣ боло рафт?” гуфт, баръакс нархи хизматрасонии алоқаи мобилӣ нисбат ба солҳои қабл тамоюли пастшавӣ дорад, на баландшавӣ.

-Дар баробари он ки бист дирам ё як сомон қимат шуд, дигар хизматрасониҳоро ширкатҳои мобилӣ ба истеъмолкунандагон пешниҳод карда истодааст. Барои мисол, 50 мегабайт интернет ё 100 дақиқаи иловагӣ дода истодааст. Агар ҳамин мегабайту дақиқаро ба маблағ ҳисоб кунем, баръакс тарифҳо арзон шуда истодаанд, на қимат, - иброз дошт ӯ.

Ҳамзамон, номбурда қайд намуд, ки баланд шудани нархи хизматрасониҳои ширкатҳои мобилӣ танҳо ба худи ширкатҳо ва ба Хадамоти алоқа дахл дорад. Ӯ гуфт: “Мо тасмим гирифтем ва амрнома ҳам ба тамоми ширкатҳои мобилӣ додем, ки ин муносибати худи ширкат ва Хадамоти алоқа аст ва ба истеъмолкунандагон ягон алоқамандӣ надорад”.