“Нархи сӯзишворӣ арзон шуд, чаро нархи роҳкиро арзон намешавад?”, ин суоле буд, ки имрӯз дар нишасти хабарии Вазорати нақлиёти кишвар мавриди баҳс қарор гирифт.

Азим Иброҳим, вазири нақлиёти Ҷумҳурии Тоҷикистон дар посух ба саволи мазкур таъкид намуд, ки “зарурати тағйири роҳкиро тавассути нақлиётҳои ҷамъиятӣ вуҷуд надорад. Агар роҳкиро арзон шуда бошад, аммо қисмҳои эҳтиётӣ гарон шудааст. Набояд инро яктарафа дид. Аз ин ҳисоб имрӯз зарурати тағйири маблағи роҳкиро тавассути нақлиётҳои ҷамъиятӣ нест”.

Ба гуфти вазири нақлиёт танҳо паст гардидани арзиши сӯзишворӣ наметавонад, маблағи роқкироро поён биёрад. Бояд дар ин баробар қисмҳои эҳтиётии воситаҳои нақлиётӣ низ арзон шавад. Дар сурати арзон шудани қисмҳои эҳтиётӣ шояд имкони паст гардидани нархи роҳкиро тавассути нақлиётҳои ҷамъиятӣ фароҳам ояд.