16 май Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо сафари корӣ ба ноҳияи Данғараи вилояти Хатлон рафтанд. Зимни сафар дар деҳоти Корези ин ноҳия барои бунёди коргоҳи истеҳсоли дару тиреза ва панелҳои алюминии ҶДММ „Куруши Кабир Индастри“ санги асос гузошта, бо лоиҳаи бунёди ин коргоҳи саноатӣ шинос шуданд.

Тавре дафтари матбуоти Президенти кишвар иттилоъ медиҳад, иқтидори истеҳсолии коргоҳ, ки бо ду хатти истеҳсолӣ дар масоҳати 12 000 метри мураббаъ сохта мешавад, дар як сол 180 000 дару тиреза ва панелҳои алюминиро дар бар хоҳад гирифт.

Ба иттилои масъулин, дар самти амалисозии ҳадафҳои стратегии Ҳукумат, татбиқи марҳила ба марҳилаи саноатикунонии босуръати кишвар дар ноҳияи Данғара рӯз то рӯз бунёди коргоҳу корхонаҳои саноатӣ ба роҳ монда мешавад. Иқдоми мазкур низ дар ҳамин замина рӯи даст гирифта шудааст.

Дар коргоҳи „Куруши Кабир Индастри“, ки аз ҷониби соҳибкори ватанӣ Олимӣ Тоҳир сохта мегардад, дар оянда имкон аст, ки 120 нафар бо кор ва маоши хуб таъмин гарданд.

Тибқи нақша оғози фаъолияти истеҳсолии коргоҳи мазкур сентябри соли 2026 пешбинӣ шуда, маҳсулоти он ба бозорҳои дохил ва хориҷи кишвар пешниҳод карда хоҳад шуд.

Зимни суҳбат Сарвари давлат муҳтарам Эмомалӣ Раҳмон ин иқдоми соҳибкорои ватаниро ибратбахш номида, ба ӯ арзи сипос намуданд.