Соли 2019 аз тарафи кормандони сохтори Кумитаи давлатии идораи замин ва геодезии Ҷумҳурии Тоҷикистон 71 нафар 98 ҷиноят содир кардаанд, ки 3 нафар нисбати соли 2018 зиёд мебошад.

Дар ин бора Хоҷазода Ориф Ашӯрӣ, раиси Кумитаи давлатии идораи замин ва геодезии кишвар, 31 январ, зимни нишасти матбуотӣ иттилоъ дода, дар идома вобаста ба масъалаи қонунвайронкунии кормандони кумитаи мазкур гуфт: “Дар ҳақиқат ин чиз ба обрую эътибори сохтори мо таъсири манфии худро мерасонад. Доим дар ҳамаи машваратҳо ва вохӯриҳо бо кормандон корҳои фаҳмондадиҳӣ гузаронида мешавад, то даст ба қонунвайронкунӣ назананд. 71 нафар кормандоне, ки дар соли гузашта қонунвайронкуниашон ошкор гардиданд, ҳамаашон аз вазифаҳояшон сабукдуш карда шуданд”.

Дар идома вобаста ба масъалаи ҳолатҳои вайронкунии қонунгузории замин иброз гардид, ки аз ҷониби Кумитаи давлатӣ ва мақомоти он дар маҳал 13 824 ҳолатҳои вайронкунии қонунгузории замин ошкор карда шуда, барои бартараф намудани ҳолатҳои ошкоргардида, 13 824 дастур дода шуд. Нисбати 12128 ҳолат парвандаҳои маъмурӣ тартиб дода, ба маблағи 5308670 сомонӣ қарорҳои ҷаримабандӣ қабул гардид, ки аз ин 4764292 сомонӣ ба суратҳисоби махсус ворид карда шудааст.