26 апрел Фестивали дӯстии ҷавонони кишвар таҳти унвони “Дӯст ояд, гарм дар оғӯш гир!”, ки дар якчанд шаҳру ноҳияҳои вилояти Суғд баргузор гардида истодааст, бо мулоқоти Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар оғоз гардид.

Раиси Кумита зимни вохӯрии хеш бо иштирокчиёни фестивал таъкид кард, ки баргузории чунин фестивалҳо боиси қавӣ гаштани дӯстӣ миёни ҷавонони шаҳру ноҳияҳои кишвар мегардад.

Ҳамзамон гуфта шуд, ки ҷавонон бояд аз шароиту имкониятҳои фароҳамовардаи роҳбарияти олии кишвар самаранок истифода баранду саҳми худро дар рушди кишвар гузоранд. Зеро ҷавонон ояндаи давлату миллат мебошанд.

Баъд аз мулоқот бо раиси Кумита иштирокчиён ба самти вилояти Суғд раҳсипор шуданд.

Иштирокчиёни фестивалро нахуст дар ноҳияи Шаҳристон муовини раиси ноҳия ва мудири бахши кор бо ҷавонон ва варзиши ноҳияи мазкур пешвоз гирифта, онҳоро хайрамақдам гуфтанд.

Пас аз хӯроки нисфирӯзӣ дар ноҳияи Шаҳристон, дар идомаи сафар иштирокчиёни фестивал ба ноҳияи Деваштич рафтанд.

Дар ноҳияи Деваштич меҳмонон бо нону намак истиқбол гирифта шуда, сипас иштирокчиён аз Маркази хизматрасонии “Малика”-и ноҳия дидан намуданд.

Гуфта шуд, маҳз сулҳу оромист, ки ҷавонон озодона ба минтақаҳои гуногуни меҳан сафар менамоянду аз ҳаёти ҳамсолони хеш огаҳ мешаванд. Маҳз чунин чорабиниҳо боис мегардад, ки ҷавонон дӯстони нав пайдо намоянду аз пешрафту тараққиёти як гӯшаи ватан дидан намоянд.

Анҷомбахши рӯзи аввали фестивал баргузории шоми ҷавонӣ дар ноҳияи Деваштич гардида, баъди он ҷавонон бо усули хона ба хона дар манзили сокинони ноҳия меҳмон шуданд.

Ёдовар мешавем, ки Фестивали дӯстии ҷавонон таҳти унвони “Дӯст ояд, гарм дар оғӯш гир!” бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар шаҳру ноҳияҳои Шаҳристон, Деваштич, Бӯстон, Гулистон ва Бобоҷон Ғафурови вилояти Суғд доир гардида истодааст. Фестивал то 30 апрели соли ҷорӣ идома ёфта, аз ҷараёни он дар гузоришҳои навбатӣ иттилоъ хоҳем дод.