Рӯзи дуюми Фестивали ҷаҳонии ҷавонон “Navruz Youth World Festival” бо сафарбарии иштирокчиёни Фестивал ба самти вилояти Суғд оғоз гардид.

Нахуст ҳайати иштирокчиёни Фестивалро дар ноҳияи Айнӣ самимона ва бо ному намаку суруду мусиқӣ пешвоз гирифтанд.

Тибқи иттилоъ, пас аз истиқбол иштирокчиён аз расму русум, анъанаҳои наврӯзӣ ва ҳаёти ҷавонони ноҳия аз наздик шинос гардиданд.

Шабнам Раҳимзода, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва роҳбарияти ноҳияи Айнӣ иштирокчиёни Фестивалро ҳамраҳӣ намуданд.

Роҳбарияти ноҳияи Айнӣ ҳайати ҷавонони аз кишварҳои хориҷ ба фестивал ташрифоварда ва ҳозиринро ба ифтихори ҷашни Наврӯзи байналмилалӣ самимона табрик намуда, қудуми онҳоро ба ин ноҳияи зебоманзар хайрамақдам гуфтанд.

Гуфта шуд, ки дар ҷаҳони муосир нақши ҷавонон дар ташаккули оянда торафт муҳимтар мегардад. Тоҷикистон зери сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста аз ташаббусҳои ҷавонон дастгирӣ мекунад.

Ёдовар мешавем, ки Фестивали ҷаҳонии ҷавонон “Navruz Youth World Festival” як чорабинии байналмилалӣ мебошад, ки ҳадафи он муттаҳид намудани ҷавонони кишварҳои гуногун дар руҳияи дӯстӣ, мубодилаи фарҳангӣ ва рушди устувор аст. Ин фестивал, ки аз анъанаҳои Наврӯз илҳом гирифтааст, рамзи навсозӣ, ягонагӣ ва сулҳ байни миллатҳо мебошад.