Донишгоҳи байналмилалии сайёҳӣ ва соҳибкории Тоҷикистон дар шашмоҳаи аввали соли ҷорӣ бо 28 муассисаи таҳсилоти олӣ ва марказҳои илмию таълимии кишварҳои хориҷӣ созишномаҳои нави ҳамкорӣ ба имзо расонид, ки қадами устувор дар таҳкими ҳамкориҳои хориҷӣ арзёбӣ мегардад.

Ин нуктаро Убайдулло Асрорзода, ректори донишгоҳи мазкур имрӯз - 29 июл зимни нишасти матбуотӣ иброз дошт.

Ӯ гуфт, ки робитаҳо бо донишгоҳҳо ва марказҳои таҳсилотии кишварҳои Индонезия, Корея, Чехия, Эстония, Чин, Гурҷистон, Россия ва Ӯзбекистон густариш ёфтаанд. Дар натиҷа, шумораи умумии созишномаҳои амалкунандаи Донишгоҳ бо шарикони хориҷӣ ба беш аз 270 адад расидааст, ки нишондиҳандаи афзоишёбандаи нуфуз ва эътирофи байналмилалии ин муассисаи таълимӣ арзёбӣ мегардад.

Дар ин давра 9 омӯзгори Донишгоҳ дар озмуни Барномаи ҳамкории техникию иқтисодии Ҳиндустон (ITEC) ширкат варзида, ғолиб омаданд ва давра ба давра дар давоми соли 2025 сафарбар гардида истодаанд.

- Дар шаш моҳи аввали соли равон 152 нафар донишҷӯи Донишгоҳ дар доираи созишномаҳои ҳамкорӣ ва табодули академӣ дар хориҷи кишвар ба таҳсил фаро гирифта шуданд, - гуфт ректор.

Шаҳло ЭШОНОВА, “ҶТ”