17 март иштирокчиёни Фестивали ҷаҳонии ҷавонон “Navruz Youth World Festival” ба шаҳри Панҷакент раҳсипор шуда, онҳоро бо ному намак ва суруду мусиқии тоҷикона пешвоз гирифтанд.

Баъд аз пазироии самимӣ иштирокчиёни Фестивал аз мавзеи таърихиву бостонии Саразми шаҳри Панҷакент боздид намуданд. Зимни боздид гуфта шуд, ки шаҳри мазкур таърихи қадима дошта, он баёнгари шаҳрсозу тамаддунофар будани миллати тоҷик мебошад.

Дар идома ҳайати ҷавонони давлатҳои гуногун, ки ширкаткунандаи Фестивал мебошанд, дар маросими кушодашавии мусобиқаи байналмилалии гӯштингирӣ, ки дар Варзишгоҳи марказии шаҳри мазкур доир гардид, ширкат варзиданд.

Дар маросими ифтитоҳи ин чорабинии байналмилалӣ роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон, масъулини шаҳри Панҷакент, роҳбарияти Федератсияи байналмилалии гуштингирӣ ва намояндаи Мақомоти иҷроияи ҳокимияти давлатии вилояти Суғд иштирок ва суханронӣ намуданд.

Иштирокчиёни Фестивал зимни иштирок дар мусобиқаи варзишии гӯштингирӣ бо ин навъи варзиши суннатии миллати тоҷик аз наздик ошно шуданд, ки он яке аз варзишҳои наврӯзӣ дар Ҷумҳурии Тоҷикистон мебошад.

Ҳамин тавр, рӯзи дуюми Фестивал бо баргузории барномаи фарҳангӣ зери унвони “Шоми ҷавонӣ” ба охир расид.

Ёдовар мешавем, ки Фестивали ҷаҳонии ҷавонон “Navruz Youth World Festival” як чорабинии байналмилалӣ мебошад, ки ҳадафи он муттаҳид намудани ҷавонони кишварҳои гуногун дар руҳияи дӯстӣ, мубодилаи фарҳангӣ ва рушди устувор аст. Ин фестивал, ки аз анъанаҳои Наврӯз илҳом гирифтааст, рамзи навсозӣ, ягонагӣ ва сулҳ байни миллатҳо мебошад.