Дар Ҷумҳурии Тоҷикистон шумораи умумии гирифторони нашъамандӣ коҳиш ёфтааст.

Дар ин бора имрӯз – 2 феврал Самад Зафар директории Агентии назорати маводи нашъаовари назди Президенти Ҷумҳурии Тоҷикистон зимни нишасти хабарии ниҳодаш иттилоъ дод.

- Тибқи маълумотҳои расмӣ дар ҷумҳурӣ ба ҳолати 1-уми январи соли 2024 - 4160 нафар нашъаманд ба қайд гирифта шудааст, ки ин нишондод нисбат ба соли 2022 (4381 нафар) 221 нафар ё 5 фоиз коҳиш ёфтааст, - зикр кард директори агентӣ.

Ҳамзамон зикр гардид, ки аз теъдоди умумии беморони нашъаманд 107 нафарро занон ташкил медиҳанд, ки ин шумора нисбат ба соли 2022 6 нафар зиёд шудааст. Аз рӯи ин омор чунин хулоса кардан мумкин аст, ки дар Тоҷикистон ба 100 ҳазор аҳолӣ 41, 6 бемори нашъаманд рост меояд.

Инчунин гуфта шуд, ки мусодираи маводи нашъаовар нисбати соли гузашта коҳиш ёфтааст.

Ба қавли Самад Зафар масъулини Агентии назорати маводи нашъаовар дар соли 2023 495кг. 097гр. маводи нашъаоварро мусодира намудаанд, ки ин нишондиҳанда нисбат ба соли 2022 25кг. 433гр. ё 4,9 фоиз кам мебошад.

Аммо номбурда зимни нишасти хабарӣ зикр кард, ки дар баробари коҳиш ёфтани мусодираи маводи нашъаовар, мутаассифона мусодираи моддаҳои психотропӣ, ки ба саломатии аҳолӣ хатари бештар дорад, 3,8 маротиба, инчунин афюн - 37,2 фоиз афзоиш ёфтааст.

Фарзонаи УМАРАЛӢ, “ҶТ”