Дар толори Кохи Суғдиёни шаҳри Хуҷанд Фестивал – озмуни вилоятии “Таронаи сарбоз” бахшида ба 30-солагии таъсисёбии Қувваҳои Мусаллаҳи Ҷумҳурии Тоҷикистон бо шукуҳу шаҳомати хоса баргузор гардида, дар он сарбозону афсарони қисмҳои низомӣ фаъолона ширкат варзиданд.

Сараввал, сардори Раёсати кор бо ҷавонон ва варзиши вилояти Суғд Мирзоқосим Каримзода чорабиниро ифтитоҳ карда, аз номи мақомоти иҷроияи хокимияти давлатии вилояти Суғд иштирокчиёнро ба ифтихори Рӯзи Артиши миллӣ шодбош намуда, зикр дошт, ки имрўз ҳамаи мо 30-юмин солгарди таъсисёбии Қувваҳои Мусаллаҳи Ҷумҳурии Тоҷикистони соҳибистиқлоламонро бо шукргузорӣ аз фазои орому осоиштаи Ватани азизамон таҷлил мекунем. Дар ин рӯзҳои пурфараҳ бароятон дар иҷрои вазифаи муқаддасу пуршараф - ҳифзи Ватан, ҳимояи манфиатҳои давлат, таҳкими дастовардҳои истиқлолият ва мустаҳкам намудани иқтидори мудофиавии мамлакат комёбиҳо орзу менамоям.

Сипас, аз ҷониби 5 дастаи қисмҳои низомии вилоят аз рӯйи номинатсияҳои хорсароён ва компазиатсияи адабӣ бо сароидани таронаҳои ватандӯстона ҳунару маҳорати хешро нишон доданд.

Дар натиҷаи баҳогузории ҳакамон ба ғолибони фестивал - озмуни мазкур ва спартакиади варзишӣ ифтихорномаву диплом ва туҳфаҳои хотиравӣ тақдим гардид.