Чанде қабл даври сеюми озмуни ҷумҳуриявии “Тараннуми Ватан” ҷамъбаст гардид. Шумораи иштирокчиён чун даври аввал ва дуюм хело зиёд буданд. Дар ин давр баробари дигар иштирокчиён як ҷавони болаёқат фаъолона иштирок намуда, муҳаббати худро нисбат ба Ватан бо қироати шеъре иброз намуд ва сазовори ҷойи аввал гардид.

Қаҳрамони мо Юсуфҷон Искандаров аст, ки ба наздикӣ ғолиби ҷойи якум ва соҳиби 10 ҳазор сомонӣ гардид. Ӯ пеш аз ҳама миннатдории хешро ба Кумитаи кор бо ҷавонон ва варзиш ва рӯзномаи "Ҷавонони Тоҷикистон" мерасонад, ки чунин озмунеро барои дӯстдорони Ватан ташкил намуданд.

Ба гуфти Юсуфҷон ин гуна озмунҳо барои бедор намудани ҳисси ватандӯстиву меҳанпарастӣ ва ифтихори миллӣ дар миёни ҷавонон мусоидат менамояд. Ӯ гуфт: “Ба назарам озмун ба мақсади дар назди худ гузошта расида тавонист, чун дар ин муддат ҳамеша наворҳои иштирокчиён дар шабакаҳои иҷтимоӣ мечархид ва ҳазорҳо одамонро фаро гирифта буд”.
Ӯ аз хурдӣ ба шеърхонӣ ва эҷоди шеърҳо шавқу рағбати зиёд дошт ва дар чорабиниҳои гуногун фаъолона ширкат меварзид ва маҳорату дониши хешро месанҷид. Ин буд, ки бо дидани эълони оғози озмуни ҷумҳуриявии “Тараннуми Ватан” ба омода сохтани навори худ шуруъ кард.

- Маро лозим омад, ки як моҳ барои мавод омодагӣ гирам. Навори банда бо овози поку бе ягон коркард (эффект) ва бо зиёда аз сездаҳ намуди либосҳои миллӣ сабт шуда, шукр тавонистам сазовори ҷойи якум гардам, ки бароям хело хушҳолкунанда аст”.

Вақте пурсидем, ки чӣ чиз ӯро водор кард, то дар озмун ширкат варзад, ҷавоб дод, ки муҳаббати амиқи ӯ нисбати Ватан ва суханони Пешвои миллат муҳтарам Эмомалӣ Раҳмон дар бораи ватандӯстӣ ягона сабаби иштирокаш дар озмун буд.

- Ман бо шеъри "Тоҷикам" дар озмун иштирок кардам, ки мазмуну муҳтавои баланди ватандӯстиро дар бар мегирад. Ва чун ҷавони даврони соҳибистиқлолӣ аз ҷавонон даъват менамоям, ки дӯстдори Ватан бошанд ва онро на бо сухан, балки бо амал исбот намоянд, - таъкид дошт Юсуфҷон.

Ба назари ӯ ин даври озмун фарқ дошт, зеро ки ҳамаи иштирокчиён бо сипоснома ва туҳфаҳо қадрдонӣ шуданд, ки ин таваҷҷуҳи зиёди Кумитаи кор бо ҷавонон ва варзиш ба ширкаткунандагон мебошад.

Юсуфҷон бо ифтихор мегӯяд, ки бо талош ва сабку услуби нав дар озмуни “Тараннуми Ватан” иштирок кардааст. Аз ин хотир, бовар дошт, ки ҳатман сазовори ҷойе мегардад. Ӯ мегӯяд: "Агар ҷойи аввалро ҳам намегирифтам, руҳафтода намешудам, зеро мақсадам на ғолиб шудан, балки ибрози муҳаббат ба сарзаминамон буд”.

Ғолибият барои ӯ масъулият мебошад. Ӯ миннатдории худро ба Пешвои миллат муҳтарам Эмомалӣ Раҳмон ва шаҳрдори Душанбе Рустами Эмомалӣ мерасонад, ки ҷавононро дастгирӣ ва раҳнамоӣ мекунанд. Ғолибият барои ӯ далели он аст, ки ҳар заҳмат натиҷа дорад ва бояд ҳамеша талош кард.

Ӯ нақшаҳои зиёде дорад. Аз ҷумла, ширкат дар озмунҳои сатҳи ҷумҳуриявӣ ва байналмилалӣ.

Ӯ дар фарҷоми суҳбат аз забони шоир гуфт:

Фахр дорам аз замин то осмонам, тоҷикам,
Қисмати ман, ин Ватан бо ҷисму ҷонам тоҷикам...

Заррина ҚОСИМОВА, “ҶТ”