Дар соҳаи нақлиёт 12 лоиҳаи сармоягузорӣ ба маблағи умумии 638 млн. 770,7 ҳазор доллари ИМА тибқи созишномаҳои қарзию грантӣ ва 521 млн. 456,0 ҳазор доллари ИМА тибқи қарордоди имзошуда мавриди татбиқ қарор доранд. Дар ин бора вазири нақлиёти Ҷумҳурии Тоҷикистон Худоёр Худоёрзода зимни нишасти матбуотӣ иттилоъ дод.

Ба гуфтаи мавсуф, дар ин давра таҷдиди роҳи автомобилгарди Хуҷанд-Исфара бо дарозии 67,7 км ба маблағи 54,0 млн. доллари ИМА, аз ҷумла қитъаи Гулистон-Исфара, Исфара-Ким, Ким-Кучкак ва Конибодом-Патар, Деҳмой-Пролетар ва Пролетар-Маданият, инчунин чорроҳаи сесатҳа дар маҳаллаи 82-юми пойтахт мавриди истифода қарор дода шуданд.

- Дар доираи маблағҳои сарфагардидаи лоиҳаи “Таҷдиди роҳи автомобилгарди Хуҷанд-Исфара” дар ҳаҷми 10,3млн. доллари ИМА дар мувофиқа бо Ҳукумати Ҷумҳурии Тоҷикистон ва Бонки ҷаҳонӣ таҷдиди қитъаи боқимондаи роҳи мошингарди Конибодом-Патар ва корҳои лоиҳакашии роҳҳои мошингарди Хуҷанд-Исфара (марҳилаи 2), Гулистон-Кӯлоб, минтақаи Барсем ва пули “Селхозтехника”-и шаҳри Хоруғ пешбинӣ шудааст, - гуфт дар идома вазири нақлиёт.

Ҳамчунин гуфта шуд, ки корҳои сохтмонӣ дар лоиҳаи “Таҷдиди роҳи автомобилгарди Душанбе-Бохтар” (марҳилаи 1-33,2 км) идома дошта, дар лоиҳаи марҳилаи дуюми он бо дарозии 39,6км корҳои омодасозӣ, топографӣ, геологӣ, лоиҳакашӣ, заминӣ-хокканӣ, кӯчонидани хати барқ, сохтмони ҷойи хоб ва бинои кории пудратчӣ ва машваратчӣ, инчунин захира намудани маводи сохтмонӣ ҷараён доранд. Аз ҳисоби сарфаи маблағҳои лоиҳаи “Таҷдиди роҳи мошингарди Восеъ-Ховалинг” ва асфалтхобонии қабати дуюми болопӯши роҳ дар қитъаи Сайрон-Қарамиқ таҷдиди роҳи мошингарди Кангурт-Балҷувон-Ховалинг бо дарозии 43км оғоз гардида, 50%-и корҳо иҷро шудаанд.

Ёдрас мешавем, ки дар раванди тадбиқи лоиҳаҳои сармоягузорӣ айни ҳол 1074 нафар мутахассисону коргарон фаъолият доранд, ки аз ин 911 нафар шаҳрвандони Тоҷикистон мебошанд.