Давоми соли 2021 дар натиҷаи гузаронидани назорати давлатӣ ба миқдори 438 779 кг маҳсулоти гуногуни ба талабот ҷавобгӯ набуда, ба қайд гирифта шудааст, ки як қисми ин маҳсулот аз ҷиҳати бехатарӣ (366 105 кг) ва қисми дигари он аз рӯи тамғагузорӣ дар борҷомаашон (72 674 кг) ба талабот чавобгӯй набуданд.

Дар ин бора 4-уми феврал Темурҷон Абдулваҳобзода, директори Агентии Тоҷикстандарт зимни нишасти матбуотӣ ба рӯзноманигорон иттилоъ дод.

Дар идома таъкид гардид, ки дар ин давра ҳамзамон маҳсулоти ғайрихӯроквории гуногун, аз ҷумла 42033 кг масолеҳи сохтмонӣ, 59 012 метр носил, 110 метр тунука, 1132 литр антифриз, 2386 дона фурӯзонаки тафсон, 4814 дона фурӯзонаки каммасраф, 25 887 адад маҳсулоти парфюмерӣ, 18 200 дона халтаи полиэтиленӣ, 3321 адад дафтар ва китоб бо сабаби ҷавобгӯ набудан ба талабот аз муомилот гирифта шуда, барои нобудсозӣ ё коркарди дубора пешниҳод шуданд.