Соли гузашта бо иштироки Ҷумҳурии Тоҷикистон 128 санади байналмилалӣ баимзо расидааст. Дар ин бора имрӯз - 6 феврал Сироҷиддин Муҳриддин, вазири корҳои хориҷии Тоҷикистон зимни баргузории нишастӣ хабарӣ иттилоъ дод.

- Тибқи натиҷаи музокироти сатҳи олӣ ва баланд, инчунин, риояи тартиботи муқарраргардида, дар марҳилаи ҳисоботӣ дар маҷмуъ 128 санади байналмилалӣ бо иштироки шарикони хориҷӣ ба имзо расид. Илова бар ин, 17 санади байналмилалӣ мавриди эътибор қарор гирифт,- гуфт вазир.

Ҳамзамон, номбурда баён дошт, ки дар соли 2025 аз ҷониби Вазорат дар маҷмуъ 67 санад барои қабул ва тасдиқ ба Ҳукумати Ҷумҳурии Тоҷикистон ва Маҷлиси намояндагони Маҷлиси Олӣ пешниҳод гардида, инчунин, 36 санад барои тасвиб ба Маҷлиси намояндагон ирсол гардидааст.

Зикр гардид, ки тадбирҳои мазкур ба таҳкими равобити байналмилалӣ ва беҳтар гардидани хизматрасониҳои консулӣ мусоидат менамоянд.

Фарзонаи УМАРАЛӢ, “ҶТ”