Дар асоси қарори Раиси шаҳри Душанбе мусобиқаи кушоди варзишӣ оид ба волейбол байни бонувони касбӣ ва ғайрикасбии вазорату идораҳо, ташкилоту муассисаҳо барои дарёфти “Ҷоми Раиси шаҳри Душанбе” бахшида ба таҷлили “Рӯзи Модар” баргузор мегардад. Дар ин бора телеграм канали раиси шаҳри Душанбе хабар дод.

Гуфта мешавад, ки ҳадаф аз баргузории мусобиқа тарғиби тарзи ҳаёти солим, рушди варзиши занона, баланд бардоштани нақши бонувон дар ҷомеа ва арҷгузорӣ ба мақому манзалати модарон арзёбӣ мешавад.

Тибқи иттилоъ, дар мусобиқа дастаҳои волейболи бонувон аз вазорату идораҳои давлатӣ, ташкилоту муассисаҳои пойтахт ширкат варзида, байни ҳам барои ба даст овардани ҷоизаҳои ифтихорӣ рақобат хоҳанд кард. Мусобиқа дар фазои дӯстона ва бо риояи қоидаҳои расмии варзишӣ баргузор мегардад.

Дар анҷоми мусобиқа ғолибон ва ҷоизадорон бо “Ҷоми Раиси шаҳри Душанбе”, медалҳо, дипломҳо ва туҳфаҳои хотиравӣ қадрдонӣ карда мешаванд.

Қобили зикр аст, ки чунин чорабиниҳои варзишӣ дар шаҳри Душанбе ҳамасола бо мақсади дастгирии сиёсати давлатӣ дар самти рушди варзиш ва таҳкими иштироки фаъоли бонувон дар ҳаёти ҷамъиятӣ роҳандозӣ мегарданд.

Яҳё МАҲМАДНАБИЕВ, “ҶТ”