Кумитаи кор бо ҷавонон ва варзиш ҷиҳати татбиқи амалии сиёсати давлатии кор бо ҷавонон ва варзиш соли 2018 дар чорабиниҳои худ 60 % аҳолии кишварро, ки ҳудуди 5,5 миллион нафарро ташкил медиҳад, фаро гирифтааст. Дар ин бора Аҳтам Абдуллозода, раиси Кумитаи кор бо ҷавонон ва варзиш, зимни нишасти матбуотӣ ба хабарнигорон иттилоъ дод.

Ба гуфтаи мавсуф Кумита тавонистааст, дар соли сипаригардида дар ҳамкорӣ бо ташкилоту муассисаҳо ва ҷомеаи шаҳрвандӣ зиёда аз 27 ҳазор чорабиниҳои гуногуни сиёсӣ, фарҳангиву маърифатӣ, варзишиву солимгардонӣ ва омӯзишию илмӣ баргузор намояд.

Ҳамчунин зикр гардид, ки Кумита дар самти расидан ба ҳадафҳои пешгузоштааш тамоми имкониятҳоро босамар истифода бурда истодааст. Аз ҷумла, ҷиҳати рушду оммавигардонии варзиш, ки яке аз самтҳои асосии фаъолияти Кумита маҳсуб меёбад, дар давраи ҳисоботӣ корҳои зиёде ба сомон расонида шуд. Дар ин давра дар шаҳру навоҳии кишвар бо харҷи зиёда аз 118 миллион сомонӣ 316 иншооти варзишӣ сохта ба истифода дода шудааст.

“Натиҷаи ҳамин дастгириҳост, ки варзишгарони тоҷик рӯз аз рӯз нуфузи варзишии хешро дар арсаи байналмилалӣ боло мебаранд. Дар доираи ғамхориҳои Пешвои миллат соли равон 649 варзишгари тоҷик ба 146 мусобиқаҳои сатҳи байналмилалӣ сафарбар карда шуданд, ки дар натиҷа ба хазинаи варзишии мамлакат 467 медал, аз ҷумла 151 медали тилло ворид гардид, ки аз шумораи умумии медалҳо 136-тои он аз рӯи намудҳои олимпии варзиш ба даст омадааст”,- иброз дошт Аҳтам Абдуллозода.

Қайд гардид, ки дар самти дастгирии иҷтимоии ҷавонон низ тасмимҳои зиёде гирифта шуда, дар ҳамин давра ба 4866 нафар ҷавонон кӯмакҳои яквақтаина расонида шудааст.