Дар Чемпионати Осиё/Уқёнус оид ба ҷудо, ки 4-5 декабри соли равон дар шаҳри Бейрути Лубнон доир шуд, варзишгарони ҷавони кишвар соҳиби 5 медал – 1 тилло, 1 нуқра ва 3 биринҷӣ шуданд.

Ҷумҳурии моро дар ин мусобиқа 9 варзишгар миёни писарон намояндагӣ карданд.

Ин варзишгарон Хурсандқул Куганов (-66кг), Абубакр Шеров (-66кг), Муҳаммадиқбол Тошов (-73кг), Масъуд Аҳмадзод (-73кг), Муҳаммадҷон Абдуҷалилов (-81кг), Шодмон Ризоев (-81кг), Раҳматулло Мирзоев (-90кг), Мансур Раҳмон (-100кг) ва Давлатҷон Назриев (+100кг) мебошанд, ки ба гирифтани 1 медали тилло, 1 нуқра ва 3 биринҷӣ даст ёфтанд.

Медали тиллоро Шодмон Ризоев дар вазни -81кг ба даст овард. Номбурда дар даври ниҳоӣ барои ба даст овардани мақоми аввал бар намояндаи дигари кишварамон Муҳаммадҷон Абдуҷалилов дастболо гардид ва Суруди миллӣ ба шарофати медали тиллои ӯ дар чемпионати мазкур садо дод.

Аз миёни тими ҷавонон Абубакр Шеров (-66кг), Масъуди Аҳмадзод (-73) ва Давлатҷон Назриев (+100кг) медалҳои биринҷиро ба гардан овехтанд.

Тими ҷудои Тоҷикистон дар Чемпионати Осиё/Уқёнус миёни наврасон ва ҷавонон дар маҷмуъ сазовори 8 медал – 1 тилло, 2 нуқра ва 5 биринҷӣ шуд.

Миёни наврасон Парвиз Абдураҳмонов (+90кг) сазовори медали нуқра, Суруш Эркаев (-60кг) ва Муҳамад Юсуфзода (-66кг) сазовори медалҳои биринҷӣ гардиданд.

Ёдовар мешавем, ки дар чемпионати мазкур 127 варзишгар аз 17 давлати қора иштирок намуда, барои ҷойҳои ифтихорӣ миёни ҳам рақобати шадид намуданд.