Қаҳрамони шашкаратаи Тоҷикистон, тими “Истиқлол”-и Душанбе дар бозии аввали марҳилаи ниҳоии байниминтақавии Ҷоми КФО (Конфедератсиони футболи Осиё)-2017 дастаи “Бенгалуру”-и Ҳиндустонро бо ҳисоби 1:0 шикаст дод. Ин дидор шоми 27-уми сентябр дар Варзишгоҳи марказии Ҳисор бо ҳузури 15 000 мухлис баргузор гардид.

Аз дақиқаҳои аввали рақобат шогирдони Мӯҳсин Муҳаммадиев ба дарвозаи рақиб зарбаҳои пай дар пай анҷом дода, дар дақиқаи 27-уми қисми аввал, бо як бозисозии хуб тавонистан дарвозаи ҳарифро рахна намоянд. Голи ягонаи дидори мазкурро бо зарбаи сар легионери русиягии тими “Истиқлол” Дмитрий Барков, ба сомон расонд.

Маврид ба зикр аст, ки ғолиби ҷуфти “Истиқлол” – “Бенгалуру” аз рӯи натиҷаи ду бозӣ маълум мегардад. Бозии ҷавобӣ рӯзи 18-уми октябр дар шаҳри Бангалори Ҳиндустон баргузор мешавад.

Бозии ниҳоии Ҷоми КФО-2017, ки рӯзи 4-уми ноябр барпо мегардад, ғолиби ҷуфти “Истиқлол” (Тоҷикистон) - “Бенгалуру” (Ҳиндустон) бо “Эйр Форс” (Ироқ) рақобат мекунад. Агар дастаи “Истиқлол” ба финал роҳ ёбад, онгоҳ бозии ниҳоӣ дар Тоҷикистон барпо мегардад.

Ёдовар мешавем, “Истиқлол” соли 2015 дар бозии ниҳоии Ҷоми КФО 31-уми октябр аз дастаи “Ҷоҳор Дарул Таъзим”-и Малайзия бо ҳисоби 0:1 мағлуб шуда буд.