24 декабри соли 2025 дар шаҳри Душанбе Маҷлиси умумии ғайринавбатии интихоботии Ташкилоти ҷамъиятии “Федератсияи тенниси рӯи мизи Тоҷикистон” баргузор гардид, ки дар он масъалаи интихоби роҳбарияти нав дар меҳвари таваҷҷуҳ қарор дошт.

Маҷлис бо иштироки намояндагони ниҳодҳои варзишии кишвар ва аъзои федератсия доир шуда, раванди он дар фазои ҳамдигарфаҳмӣ ва ҷонибдорӣ аз рушди минбаъдаи риштаи тенниси рӯи миз ҷараён гирифт. Дар натиҷаи раъйдиҳии ошкоро Арабзода Нуралӣ Сайвалӣ бо ҷонибдории якдилонаи аъзои Федератсия ба вазифаи раиси Федератсияи тенниси рӯи мизи Тоҷикистон интихоб гардид.

Дар кори маҷлис Шокирзода Муҳаммадтолиб, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Дилшод Назаров, ноиби раиси Кумитаи миллии олимпии Тоҷикистон, Абдуллозода Муҳаммадшо, котиби генералии Кумитаи миллии олимпии Тоҷикистон ва дигар шахсони расмӣ иштирок намуда, андешаҳои худро ҷиҳати таҳкими низоми идоракунӣ ва рушди ин риштаи варзиш иброз доштанд.

Иштирокчиёни ҷаласа изҳори умед намуданд, ки бо интихоби роҳбарияти нав фаъолияти Федератсия марҳилаи тозаеро оғоз карда, таваҷҷуҳ ба омодасозии варзишгарони ҷавон, фароҳам овардани шароити беҳтар барои тамрин ва баланд бардоштани сатҳи рақобатпазирии теннисбозони тоҷик дар мусобиқаҳои байналмилалӣ тақвият хоҳад ёфт.

Гузориш аз ҷаласа нишон дод, ки ҷомеаи варзишии кишвар рушди минбаъдаи тенниси рӯи мизро ҳамчун яке аз самтҳои муҳими сиёсати варзишӣ арзёбӣ намуда, аз роҳбарияти нав интизори ташаббусҳои нав ва натиҷаҳои назаррас мебошад.

Яҳё МАҲМАДНАБИЕВ, “ҶТ”