18-уми апрел дар доираи даври дуюми марҳилаи гурӯҳии Лигаи чемпионҳои Осиё-2021 қаҳрамони бисёркаратаи Тоҷикистон дастаи “Истиқлол” бозии дуюми худро бо намояндаи ҳамсоякишварамон дастаи АГМК-и Ӯзбекистон доир намуд.

Сабқат бисёр ҷолибу диданӣ сурат гирифта, дастаи овозадори “Истиқлол” бо натиҷаи 3:2 ҳарифи сарсахти худ, дастаи АГМК-и Ӯзбекистонро шикаст дод.

Якумин голи ҷониби Истиқлолро дар дақиқаи охири қисмати аввали дидор футболбози АГМК Йован Джокич иштибоҳан тӯбро ба дарвозаи тими худ ворид намуд. Дар дақиқаи 55-уми бозӣ ҳамлагари "Истиқлол" Манучеҳр Ҷалилов голи дуюмро дар дидори мазкур ба самар расонид. Бо гузашти се дақиқа бозигари АГМК Зафар Полвонов як гол ба дарвозаи "Истиқлол" зад. Дар дақиқаи 82-юми дидор Муҳаммадҷон Раҳимов ҳисобро 3 бар 1 ба нафъи дастаи “Истиқлол” кард.

Дар дақиқаҳои охири рақобат аз ҷониби бозингари тими ҳариф Зафар Полвонов дуюмин гол ба қайд гирифта шуд. Ҳамин тариқ, бозӣ бо ҳисоби 3:2 ба охир расид.

Ёдовар мешавем, ки ин пирӯзии аввалин ва таърихии дастаи “Истиқлол” дар Лигаи чемпионҳои Осиё дар соли 2021 мебошад. Ҳамин тариқ, баъд аз бозии дуюм мавқеи дастаи “Истиқлол” дар гурӯҳи “А” бо касби 4 имтиёз дар ҷои дуюм қарор гирифт.

Қ. МАҲМАДҶОНОВ, “ҶТ”