Дастаи “Истиқлол”-и Тоҷикистон дар даври сеюми рақобати марҳилаи гурӯҳии Лигаи чемпионҳои Осиё-2021 дар гурӯҳи “А” мағлубияти аввалини худро аз ғолиби секарата Лигаи чемпионҳои Осиё дастаи “Ал-Ҳилол”-и Арабистони Саудӣ гирифт. Бозии мазкур шоми дирӯз дар варзишгоҳи "МРСООЛ Парк"- и шаҳри Ар-Риёз баргузор гардида, ба суди мизбонон ба анҷом расид.

Рақобати дастаҳо ҷолибу диданӣ сурат гирифта, дастаи “Ал-Ҳилол” –и Арабистони Саудӣ бо афзалиятҳои бештари худ дар дақиқаи 39-уми бозӣ голи аввалини худро ба дарвозаи “Истиқлол” ба ҳадаф расонид. Метавон гуфт, ки бозингарони бошгоҳи “Истиқлол”-и Тоҷикистон низ маҳорати олӣ нишон дода, голи ягона ва ҷавобиро ҳимоятгари даста Ваҳдат Ҳаннонов дар дақиқаи 42-ми рақобат ба сомон расонида, ҳисобро баробар кард.

Қисмати дуюми бозӣ низ бо пешсафии бошгоҳи “Ал-Ҳилол” -и Арабистони Саудӣ оғоз ёфта, дар дақиқаҳои 52 ва 64-уми бозӣ ниммуҳофизатгари даста Ҳаттан Баҳебрӣ бо ду голи ҳалкунандаи худ дарвозаи Рустам Ятимовро рахна сохт. То фарҷоми рақобат барои бозингарони бошгоҳи “Истиқлол” дигар имкони задани гол муясар нашуд ва ҳамин тариқ бозии мазкур бо натиҷаи 3-1 ба фоидаи дастаи “Ал-Ҳилол” -и Арабистони Саудӣ хотима ёфт.

Ёдовар мешавем, ки бошгоҳи "Истиқлол" бо як мусовӣ, як пирӯзӣ ва як бохт бо доштани 4- имтиёз дар зинаи 2- юми ҷадвал қарор дорад. Ҳамчунин, хотирасон мекунем, ки дастаи "Истиқлол" дидори навбатиашро бо "Ал-Ҳилол" 25- уми апрел дубора доир мекунад.

Қ. МАҲМАДҶОНОВ
“ҶТ”