Ду бародар, ду таҳамтан ва ду навниҳоли навруста, ки дар боғи варзиш майли шукуфтан доранд. Якеаш нуҳ сол дораду дигаре ҳашт. Ин ду қаҳрамони кӯчак зодаи ноҳияи Ёвон мебошанд. Аз замоне, ки ин тифлакон чашм ба олами ҳастӣ боз намуданд, падару модар бо умеду орзуҳои зиёд исмашонро гузоштанд, Мунис ва Абубакр. Ба сол Мунис аз Абубакр соле бузургтар аст. Ба нақли падараш Авазхӯҷа Каримов онҳо аз замони кӯдакӣ писарбачаҳои чолоку беқароре будаанд.

- Писаронам аз кӯдакияшон шӯху беқарор буданд. Даву тозу футболбозиҳо дар саҳни ҳавлӣ бо ҷамъи писарони ҳамсоя басандагӣ намекард, ки дар хона низ онҳо зиёд беқарорӣ менамуданд. Ҳамин беқарориҳояшон буд, ки хостам онҳо ба варзиш машғул шаванд, то энергияи зиёди худро дар тамринҳо сарф кунанду дар хона каме оромтабиат гарданд. Ман, ки худ варзишдӯстдор будаму ошиқи машқу тамрин дар ин самт ба писаронам роҳ кушодам, то онҳо муваффақ гарданд.

Агар Мунис ва Абубакрро ирсан варзишгар гӯем, иштибоҳ намекунем, чун падарашон Авазхӯҷа Давлатов ҳам худ дӯстори варзиш буда, 7 сол ба варзиш машғул шудааст. Машқу тамринҳояшро ҳам дар Тоҷикистон ва ҳам дар Русия мегузаронд. Пас аз муддате ӯ фикр мекунад, ки фарзандони хешро, ки он замон яке 4 ва дигаре 5 сол доштанд, ба риштаи варзише гузорад, ки тавонанд дар оянда ливобардори меҳан гарданд. Ба ҳамин хотир навъи варзиши ҷиу-ҷитсуи бразилиро интихоб мекунад. Бобои наврасон ҳам як замоне дар ҷашну маросимҳо паҳлавонӣ мекарду аз хуни паҳлавониаш гиребони ифтихор меафшонд.

Дастовардҳои Мунис ва Абубакр ғайриоддиву фавқулода аст, яъне дар якҷоягӣ онҳо соҳиби 118 медали тилло ва зиёда аз 28 камарбанд гардидаанд, ки дар риштаи ҷиу-ҷитсуи кишвар дастоварди беназир маҳсуб меёбад. Ин ҳама шону шуҳрат ба ин ду навраси боистеъдод муфт ба даст наомадааст. Падари варзишгарон ба хотири рушд кардани онҳо ҳар чи дар бисоташ дар ватан дошт, бифрхту барои ҷигарбандонаш роҳ кушод ва ҳаргиз изҳори пушаймонӣ накард.

- Вақте дидам, ки писаронам аз варзиш рӯ тофтанӣ нестанду думболи машқу тамринанд, кӯшиш кардам то барояшон роҳкушо бошам. Ва ҳамин тавр ҳам шуд, барояшон шароит муҳайё намудаму ба ин ҷодаҳои муваффақият расондам. Ҳар он чи ки аз дастам ояд, баҳри пешрафти фарзандонам анҷом медиҳам, - мегӯяд падари паҳлавонон Авазхӯҷа Каримов.

Боромади аввалини Мунис ва Абубакр дар мусобиқаҳои байналмилалӣ соли 2018 дар Белорусия иттифоқ афтод, ки ҳарду ҳам соҳиби ҷойи якум гаштанд. Баъди парчами Тоҷикистонро баланд бардоштан, хурсандии наврасон ҳадду канор надошт. Бештар аз онҳо падарашон шоду хурсанд буд, чун умед ҳосил кард, ки дарахтони парвардааш самар медиҳанд.

- Воқеан ҳам, муваффақиятҳои аввалин ҳамеша хотирмону фаромӯшношуданӣ боқӣ мемонад. Чун ин аввалин баромади ман буд, аз хушҳолӣ парвоз кардам, - мегӯяд Абубакр.
Мунис изҳори қаноатмандӣ намуда, гуфт: “бори аввал ба майдони рақобат баромадаму ғолиб омадам. Вақте Суруди миллӣ садо доду парчами кишвари маҳбубамон баланд шуд, аз ин лаҳзаи хубу хотирмон лаззат мебурдам”.

Номи Мунис ва Абубакр замоне вирди забонҳо гардид, ки ин ду нав-раси боистеъдод дар чемпионати ҷаҳони ҷуи-ҷитсу, ки мизбониашро АМА бар уҳда дошт, ҳангомаофарӣ намуда, Мунис сазовори медали тилло ва Абубакр бо иллати ҷароҳат сазовори мақоми севвум гардид.

ШИКАСТИ НАВРАСИ БРАЗИЛИЯГӢ

Ҳоло Мунис дар ҷаҳон аз вазни 30 кг баромад намуда, ба худ ҳамто надорад. Ӯ бо 35 пирӯзии бебохт, навраси бразилиягиро, ки 18 пирӯзӣ дошту аз рӯи рейтинги ҷаҳонӣ дар зинаи аввал байни наврасон қарор дошт, мағлуб намуда, садрнишини ҷадвал гардид. Ҳамакнун шумораи пирӯзиҳои Мунис ба 64 расидаву аз они бародараш ба 54.

Тибқи иттилои сарчашмаҳо чанд сол пеш Тоҷикистон дар рейтинги умумиҷаҳонии ҷуи-ҷитсу байни нав-расон дар зинаи 276 –ум қарор дошт ва маҳз бо кӯшишу талошҳои Мунису Абубакр ва дигар варзишгарон ҳоло кишвари мо садрнишини ин ҷадвал аст.

Мунис дар вазни 30 кг ва Абубакр дар вазни 27 килограмм дар мусобиқаҳо баромад мекунанд. Онҳо ҳарду баробар машқу тамрин карда, кӯшиш мекунанд, ки доимо муваффақ бошанду номбардори ватани азизи хеш.

Имрӯз мусобиқае нест, ки бидуни онҳо гузарад. Бо дохил шудани намуди ҷиу-ҷитсу ба рӯйхати намудҳои Бозиҳои олимпӣ боз ҳам имкониятҳо барои ин варзишгарони навраси тоҷик фарох гардид.

Чанде пеш дар шаҳри Абу-Дабии Аморати Муттаҳидаи Араб Қаҳрамонии ҷаҳон оид ба ҷиу-ҷитсу баргузор гардид. Мунис ва Абубакр дар ин мусобиқаи ҷаҳонӣ боз ҳам тавонистанд, ки соҳиби нишони тилло гарданд.

Абубакр бо мағлуб кардани варзишгарони Русия ва АМА нишони 54-умашро аз мусобиқаҳо соҳиб шуд.

Мунис бошад, зери вазни то 30 кг бо шикаст додани намояндагони Босния, Ҳерсогевина ва Қазоқистон нишони 64-умашро аз мусобиқаҳои ҷаҳонӣ ба даст овард.

ИД ДАР ДУШАНБЕ

26-уми ноябри соли гузашта Фурудгоҳи байналмилалии шаҳри Душанбе лабрез аз одамон буд. Ҷамъомадагон руҳияи идона дош-танд, чун ду навраси бомаҳорати тоҷик - бародарон Мунис ва Абубакр Давлатовҳо пас аз 6 соли дурӣ аз ватан ҳамакнун бо нишону камарбанди зиёд вориди пойтахт шуданд. Мухлисонашон бо ливои меҳан ва шиорҳо садоқати хешро ба Мунису Абубакр нишон медоданд. Магар метавон варзишгароне, ки 118 маротиба парчами кишварро аз намуди варзиши ҷиу-ҷитсу дар арсаи ҷаҳон баланд бардоштаанд, чунин самими пишвоз нагирифт? Табиист, ки на.

Ҳоло Мунис ва Абубакр дар Федератсияи Русия таҳсили илм ва машқварзӣ мекунанд. Онҳо дар се мактаби варзишии Москва тамрин мекунанд, ки мактаби ҷудои дорандаи нишони биринҷии Бозиҳои олимпӣ Расул Боқиев яке аз онҳост.

Ҳоло барои Мунис ва Абубакр роҳи варзиш ба тозагӣ оғоз гардидааст. Орзуи онро дорем, ин ду бародарпаҳлавон, ки ояндаи варзиши кишварамон мебошанд, минбаъд низ парчами меҳанро баланд бардоранду варзиши тоҷикро ба ҷаҳониён муаррифӣ намоянд.