Нигоҳе ба дастовардҳои варзишии сол, ки пур аз фатҳу ифтихороти бузург буд

Мавсими 2022-2023-ро агар бобарортарин сол дар ҳаёти варзишии кишвар унвон кунем иштибоҳ нахоҳем кард, зеро дар ин давра баробари иштироки варзишгарон дар як қатор мусобиқаҳои байналмилалӣ ва созовор гардиданашон ба мақомҳои ифтихори инчунин Тоҷикистон мизбони як қатор мусобиқаҳои бонуфуз гардид, ки бешак дар китоби варзишии кишвар сафҳаҳои ҷадидро боз намуд.

Дар ин давра Кумитаи миллии олимпии Тоҷикистон муҳимтарин бозиҳои варзишии соли 2023-ро барои дарёфти роҳхатҳои олимпӣ эълон намуд, ки барои таъмини холҳои олимпӣ барои варзишгарони меҳан замимаи асосӣ мегузоранд.

Кумитаи миллии олимпии Тоҷикистон зимни натиҷагирӣ аз дастоварди варзишкорони тоҷик дар соли 2022, ҳамзамон муҳимтарин мусобиқаҳои варзишӣ дар соли 2023-ро, ки дар онҳо имкони гирифтани роҳхатҳои олимпӣ мавҷуд аст, ном гирифтааст.

Ба иттилои ин манбаъ, муҳимтарин мусобиқаи варзишии соли 2023 19-умин Бозиҳои Осиё аст, ки аз 23 сентябр то 8 октябр дар шаҳри Ҳангжоуи Чин баргузор мешавад. Баргузории ин мусобиқаи варзишӣ ба далели пандемияи COVID-19 як сол ба таъхир андохта шуд. Ба барномаи бозиҳо 40 намуди варзиш, аз ҷумла бокс, шиноварӣ, тӯббозӣ дар об ва камонварӣ ворид шудааст, ки дар он варзишгарон имкони дарёфти роҳхат ба Бозиҳои олимпиро доранд.

Дар баробари ин, рӯзҳои 17-26 ноябр дар шаҳрҳои Бангкок ва Чонбурии Тайланд 6-умин Бозиҳои Осиё дар иншооти пӯшида ва ҳунарҳои размӣ баргузор мешавад. Ба барномаи ин бозиҳо 35 намуди расмии варзиш ва ду намуди варзиши намоишӣ ворид шудааст ва ҳамагӣ 334 мусобиқаро дарбар мегирад.

Инчунин моҳи августи соли 2023 баргузории 2-юмин Бозиҳои соҳилии ҷаҳонии ANOC дар Балии Индонезия дар назар аст, ки варзишгарони тоҷик дар сурати ба даст овардани роҳхат имкони иштирок дар онро доранд.

Ҳамзамон тими мунтахаби футболи кишвар дар Ҷоми Осиё-2023 ширкат хоҳад кард, ки эҳтимол охири сол дар Қатар баргузор гардад. Ҳамчунин дастаҳои мунтахаби наврасони то 17-сола моҳи май дар Тайланд ва ҷавонони то 20-солаи Тоҷикистон моҳи март дар Ӯзбекистон дар марҳилаи ниҳоии Ҷоми Осиё иштирок намуданд.

Аз сӯйи дигар, Тоҷикистон рӯзҳои 2-4 июн бори аввал дар таърихи хеш мизбони Гран Прӣ дар риштаи ҷудо гардид. Дар воқеъ Гран Прии Душанбе-2023, ки бори нахуст дар Тоҷикистон доир гардид ба як иди ҳақии дусдорони ҷудо мубаддал гашт. Дар ин мусобиқа ҷудокорони кишвар бо гиифтани 7 медал байни 40 кишвари иштирокчӣ таърихсозӣ карданд.

Ҳамчунин, дар Тоҷикистон дар Рӯзи пойтахт (шанбеи сеюми моҳи апрел) ниммарафони Душанбе ва моҳи март аввалин мусобиқаи байналмилалӣ - Ҷоми Тоҷикистон дар риштаи қайиқронии слалом доир гардид.

Гуфта мешавад, ки ҳамаи мусобиқаҳои ҷаҳонии ҷудо дар соли 2023 интихобии олимпӣ маҳсуб меёбанд. Дар мусобиқоти қаҳрамонии гӯштин, ки моҳи сентябр дар Белгради Сербия баргузор мешавад, дар ҳар вазн (6 вазн гӯштини юнонӣ-римӣ, 6 вазн гӯштини озод, 6 вазн гӯштини бонувон) 4 роҳхати олимпӣ дода мешавад. Дар мусобиқоти қаҳрамонии варзишҳои обӣ моҳи июл дар Фукуокаи Ҷопон дар намуди эстафета ва даставӣ 3 роҳхати олимпӣ бурд мешавад. Дар намудҳои инфиродӣ бошад, варзишгарон бояд меъёрҳои муқарраркардаи Созмони ҷаҳонии варзишҳои обӣ (World Aquatics)-ро иҷро кунанд.

Тоҷикистон дар соли 2022 мизбони ду мусобиқаи сатҳи баланд – мусобиқаи қаҳрамонии велосипедронӣ дар шоҳроҳ ва мусобиқаи қаҳрамонии кураш гардид. Дар ин замина зикр мешавад, ки Федератсияи байналмилалии кураш бо натиҷагирӣ аз соли 2022 мусобиқаи қаҳрамонии Осиё дар Душанберо беҳтарин мусобиқаи сол эълон кард. Дар охири соли 2022 бошад, варзиши миллии тоҷикон - гӯштингирӣ дар Вазорати адлияи Швейтсария сабти ном шуда, мақоми байналмилалиро касб кард ва Душанбе ҳаққи баргузории Гран Прии ҷудо дар солҳои 2023-2026-ро ба даст овард.

Рӯйдоди муҳиму таърихии дигар барои варзиши кишвар дар соли равон, ин баргузории Чемпионати Осиё оид ба гӯштингирӣ маҳсуб меёбад. Чемпионати мазкур аввалин маротиба дар таърихи гӯштини милли кишвар ва он ҳам дар арафаи Рӯзи Ваҳдати миллӣ - 27-июн дар шаҳри Душанбе бо иштироки варзишгарони 30 кишвари қораи Осиё баргузор гардид. Ба андешаи коршиносони масоили варзишӣ ин мусобиқа яке аз беҳтарин сабқатҳои қораи Осиё аз ҷиҳати сатҳу сифат унвон гардида буд.

Инчунин варзишгарони кишвар соли равон дар Бозиҳои II кишварҳои Иттиҳоди Давлатҳои Мустақил (ИДМ), ки дар Беларус ҷараён дорад ширкати фаъолона доранд. Дар ин мусобиқа дастаи мунтахаби Тоҷикистон бо шумули 132 нафар аз рӯи 13 намуди варзиш ширкат меварзанд.

Аз дастовардҳои инфиродии варзишкорони Тоҷикистон дар соли 2022 бошад, ба медали тилоии паҳлавони тоҷик Темур Раҳимов дар Гранд Слам ва медали нуқраи ӯ дар мусобиқаи ситораҳои ҷудои ҷаҳон ишора намудан шарт ва зарур аст. Ба ин тартиб, Темур Раҳимов дар радабандии ҷаҳонӣ дар вазни беш аз 100кг мақоми аввалро соҳиб шуд. Дар баробари Темур Раҳимов корнамоии Баҳодур Усмонов дар Чемпионати ҷаҳонии бокс ва сазовор гардиданаш ба мақоми сувум, инчунин медали нуқраи Обид Ҷебов аз Гран Прии Улан-батор ва ду нишони заррини Сомон Маҳмадбеков аз Гран Прии Душанбе ва Гран Слами Қазоқистон воқеан қобили васфу ситоиш мебошад.

Инчунин дар соли 2022 тими мунтахаби футболи Тоҷикистон бори аввал ба марҳилаи ниҳоии Ҷоми Осиё-2023 роҳ ёфт.

Илова бар ин, ҳайати олимпии Тоҷикистон дар 5-умин Бозиҳои ҳамбастагии исломӣ дар Қунияи Туркия ширкат карда, 8 медал – 3 нуқра ва 5 биринҷӣ ба даст овард.

Бе муболиғаву муҳобот метавон гуфт, ки мавсими соли 2022-2023 кулвори хотироти варзишии кишвар пур аз фараҳу ифтихороти бузург буд, чун фарзонафарзандони кишвар ҳар замон бар он кулвор бо фатҳи мусобиқае нишоти дигар зам мекарданд.

Яҳё МАҲМАДНАБИЕВ, "ҶТ"