Дар зиндагӣ касе муваффақ мешавад, ки баъди афтодан иродаи дубора хестанро кунад. Дар варзиш аз рӯи ин шиор амал намудан ба манфиати кор хоҳад буд. Зеро варзиш бе бохт намешавад ва барои варзишгари боирода ҳар бохт як дарс аст ва ӯро обутобёфта мегардонад.

- Писарам, варзиш кори саҳлу осон нест. Обрӯи варзишгар обрӯи миллат аст. Ин касб, пеш аз ҳама, фурутанию покизагиро талаб мекунад. Махусан паҳлавон бояд бо нангу номус ва хислатҳои некаш барои дигарон намуна бошад,- мураббии солхурда баъди тамринҳои зиёд дар гӯшаи толор бо шогирдаш нишаста ин суханонро мегуфту ҳисси ифтихору ғурури миллии шогирдашро дучанд мекард.

- Салом, устод Обидов,- гӯён марди миёнасол ба суҳбати онҳо ҳамроҳ шуд.

- Салом, шогирди азиз! Кадом шамол парронд? Баъди аз варзиш канор рафтанат солҳо шуд, ки аз наздик надидем. Гоҳ–гоҳ телефон мекардӣ, аз он ҳам мондӣ...

- Дар хориҷа будам, аз паи даводаву такопӯи зиндагӣ. Ин чеҳра шинос метобад? - ба варзишгари дар наздашон рост истода нигариста пурсон шуд аз мураббӣ.

- Бале, ин ҷавон варзишгари наве дар майдони варзишии кишвар аст. Шояд чеҳраашро аз тариқи телевизион дида бошӣ. Баъди дастовардҳои охираш хизматашро қадр карда дар борааш рӯзноманигорон зиёд менависанду барнома омода мекунанд. Номаш Хоҷазода Беҳрӯз. Зодаи деҳаи Ҳушёрии ноҳияи Варзоб. Соли таваллудаш 1995. Ҳамаги 13 сол дошт, дунболи бародараш ба толор омаду хоҳиши бо бачаҳо тамрин карданро кард. Аз аввал ҳушёру чолок менамуд. Омадан баробар аллакай бисёр чизҳоро мефаҳмид. Баъдан фаҳмидем, ки зинаи аввали тамринро дар маъракаҳои гӯштингирӣ, аз наврӯзиҳо гирифтааст. Гӯштини миллии мо заминаи асосии муваффақ шудан дар дигар намудҳои гӯштин аст. Ҳамин сабаб шуд, ки Беҳрӯз зуд дар варзиш инкишоф ёфт. Чор маротиба қаҳрамони Тоҷикистон, ҷоизадори Ҷоми “Пойтахт-2017” , “Наврӯз-2017”, ғолиби Фестивали бозиҳои миллии варзишӣ дар соли 2017 ва дигар шоҳҷоизаҳо дар намуди гӯштини миллӣ, ду маротиба қаҳрамони Тоҷикистон (солҳои 2014 миёни наврасон, 2017 миёни калонсолон) аз намуди гӯштини самбо, дорандаи медалҳои биринҷии чемпионати Осиё дар солҳои 2014-2015, қаҳрамони Осиё дар соли 2017 дар риштаи самбо, қаҳрамони вазни 66 килои Тоҷикистон дар соли 2016 аз намуди дзюдо, иштирокчии чемпионати ҷаҳон оид ба дзюдо дар Будапешт соли 2017 аст. Аз 16 то 27 сентябр дар шаҳри Ашқободи Туркманистон 5-умин Бозиҳои Осиё дар иншооти пӯшида ва ҳунарҳои размӣ миёни 65 давлати қораи Осиё баргузор гардид. Беҳрӯз дар мусобиқаи мазкур дар ду намуди гӯштин – кураш ва самбо ҳунарнамоӣ кард. Дар намуди кураш медали нуқра ва аз рӯи намуди самбо дар вазни 74 кило сазовори медали тилло шуд. Вале ин ҳама моро қаноатманд намекунад. Барои миллат чӣ қадар заҳмат кашем ҳам, басанда нест. Орзуҳои мо амалӣ нашудаанд, то яке аз фарзандони дигари тоҷикро мисли Саидмуъмин Раҳимов дар чемпионати ҷаҳонии самбо миёни калонсолон дар зинаи аввал набинам ва дар намуди дзюдо Суруди миллии Ватани маҳбубамонро дар олимпиада нашунавам, дар ин соҳа худро хизматнишондода намеҳисобам.

Ин суханҳоро Садриддин Обидов, сармураббии самбои яккачини ҷумҳурӣ мегуфту қатраҳои ашк гирди чашмони ожангдорашро падид меомад ва ноаён барои дарс гуфтан ба назди шогирдонаш рафт, ки ҳама мисли афсарон дар тан либоси варзишӣ, саф ороста буданд. Марди миёнасол, ки худро Салим муаррифӣ кард, баъди рафтани мураббӣ аз ҳунарнамоии Беҳрӯз дар чемпионати ҷаҳон аз намуди дзюдо ёдовар шуд: “Ман аз тариқи телевизион ҳунарнамоии шуморо тамошо кардам. Ягона паҳлавоне будед, ки аз тими Тоҷикистон дар чемпионати ҷаҳони имсола чор давр гӯштин гирифтед. Барои шумо мушкил нест дар се намуди варзиш ҳунарнамоӣ кардан?”

- Ҳар як кор ба худ мушкилии хоса дорад. Варзиш майдони нангу номус ва набард аст. Вақте вориди ин саҳна мешавед, баъди як бор боло рафтани Парчам дар мусобиқаҳои байналмилалӣ ҳама мушкилиҳо пушти сар мешаванд. Мо ки тамринро аз гӯштини миллӣ оғоз кардем, дар дигар намудҳои гӯштин мушкилӣ камтар буд. Зеро гӯштини тоҷикӣ модари тамоми гӯштинҳост, - гуфт Беҳрӯз. - Имрӯз барои мо – варзишгарон, родмардони миллатамон дар самти варзиш корнамоиҳои зиёд кардаанд, ки ҳар яки онҳо барои мо дарси ибрат аст. Қаҳрамонии ҷаҳонпаҳлавон Саидмуъмин Раҳимов, хислатҳои наҷибу хоксории қаҳрамони Бозиҳои олимпӣ Дилшод Назаров, партобҳою беҳтарин усули Расул Боқиев сармашқи кори мост. Дастгириҳо ва таваҷҷуҳи Пешвои варзишпарварамон нисбати варзишу варзишгар ифтихори мост. Аз мо танҳо заҳмат мебояду бас.

Хонандаи азиз, ёдовар мешавем, ки аз 8 то 13 ноябри соли ҷорӣ дар шаҳри Сочии Федератсияи Русия чемпионати ҷаҳон миёни калонсолон аз намуди самбо баргузор мегардад. Беҳрӯз Хоҷазода имрӯзҳо барои омода шудан ба ин мусобиқаи бонуфӯз давоми рӯз дар ду баст тамрин кардаистодааст. Ӯ арақи ҷабин мерезад, то Парчами кишвар дар зинаи аввал парафшон шаваду дастоварди ҷаҳонпаҳлавон Саидмуъмин Раҳимов, ки имрӯз барои ҳар як самбочии кишвар орзуву ҳавас боқӣ мондааст, такрор шавад.

Олимпиада, ки қуллаи баландтарини варзиш маҳсуб меёбад, садо додани сурудии миллии ҳар як кишвар дар ин чорабинии бошукӯҳ тавонмандии он миллатро ифода мекунад. То Бозиҳои олимпии Токиё-2020 се сол боқӣ мондааст. Беҳрӯз ҳам имрӯз ба мисли дигар варзишгарони тоҷик барои роҳхат ба даст овардан дар ин олимпиада талош дорад. Арақе, ки аз ҷабин ва рухсори гандумгуни ин ҷавон бар асари тамринҳои зиёд мешорад, бошад, ки дар Чемпионати Ҷаҳон - 2017 ба ашки шодӣ ва ифтихор мубаддал гарданд.