Варзишгарони маъруфи кишвар, Беҳрӯз Хоҷазода ва Шаҳриёр Даминов медали нуқраи бозиҳои Осиё-2018-ро соҳиб гардиданд.

Беҳрӯз Хоҷазода, қаҳрамони феълии ҷаҳон оид ба самбо дар намуди кураш дар вазни 81 кг сазовори медали нуқра шуд. Ин паҳлавон муборизаро дар даври ҳаштякниҳоӣ шуруъ намуда, бар варзишгари Ӯзбекистон Мусо Собиров дастболо шуд. Пасон дар марҳилаи чорякниҳоӣ варзишгари чинӣ Чунта Ҳуангро шикаст дода, дар даври минбаъда бар варзишгари эронӣ Умед Тазтак ғалаба кард. Дар марҳилаи ниҳоӣ Беҳрӯз бо варзишгари дигари эронӣ Илёс Алӣ Акбарӣ рӯ ба рӯ гардида, дар ин сабқат ноком гардид.

Намояндаи дигари дастаи миллии кишвар Шаҳриёр Даминов дар мусобиқа оид ба қаиқронӣ, дар намуди байдаркаи якнафара ширкат намуда, дар масофаи 1000 метр медали нуқраи дигари бозиҳоро ба даст овард.

Ёдовар мешавем, ки бозиҳои тобистонаи Осиё-2018 аз 18 август то 2 сентябр дар шаҳрҳои Ҷакарта ва Палембанги Ҷумҳурии Индонезия баргузор мегардад, ки дар он 10000 варзишгар аз 45 давлати қитъаи Осиё иштирок менамоянд.

Аз рӯи натиҷаи ба даст овардани медалҳо дастаи мунтахаби Тоҷикистон, айни замон бо гирифтани се медали нуқра, ба зинаи 30-ум баромад.

Медали аввалини дастаи миллии Тоҷикистонро, 26 август қаҳрамони бозиҳои олимпӣ, варзишгари маъруфи кишвар Дилшод Назаров дар қувваозмоии гурзандозӣ соҳиб шуда буд.