Аз 18 август то 2 сентябри соли равон дар шаҳрҳои Ҷакарта ва Палембанги Индонезия 18-ум Бозиҳои тобистонаи Осиё баргузор мегардад. Дар ин мусобиқаи бонуфӯз варзишгарони тоҷик аз намудҳои мухталифи варзиш кишварамонро муаррифӣ мекунанд.

Аз ин пеш, масъулини соҳаи варзиш барои омода ва муайян намудани тимҳои мунтахаб ба Бозиҳои тобистонаи олимпӣ муаззаф гардида буданд.

Ба иттилои Кумитаи миллии олимпии Тоҷикистон, то имрӯз ҳайати дастаи мунтахаби кишвар аз рӯи намудҳои тими мунтахаби бонувон оид ба футбол, варзиши сабук, гӯштини самбо, гӯштини кураш муайян гардиданд.

 Футболбозбонувони кишвар дар ҳайати 18 нафар ба бозиҳо сафарбар мегарданд. Онҳоро ду мураббӣ ва як табиб ҳамроҳӣ менамоянд.
Мусобиқаи футбол миёни бонувон 16 август дар шаҳри Палембанг оғоз мегардад. 11 даста дар се гурӯҳ барои ҷоизаҳо талош мекунанд. Тоҷикистон дар гурӯҳи “В” бо дастаҳои Кореяи Шимолӣ, Ҳонг Конг ва Чин вомехӯрад. Аз гурӯҳҳои “А” ва “В” седастаӣ ва аз гурӯҳи “С” ду даста ба даври чорякфинал роҳ меёбанд. Бозии финалӣ 30 август баргузор мешавад.

Бозиҳои гурӯҳии мусобиқаи футболи бонувон дар гурӯҳи “В”:

17 август. Соати 16:30 (вақти Душанбе)
Кореяи Шимолӣ – ТОҶИКИСТОН

20 август. Соати 16:30 (вақти Душанбе)
ТОҶИКИСТОН - Чин

22 август. Соати 16:30 (вақти Душанбе)
Ҳонг Конг - ТОҶИКИСТОН

Тими мунтахаб аз намуди варзиши сабук:

Назаров Дилшод (гурзандозӣ);
Мӯсоев Абдурауф (гурзандозӣ);
Пронженко Кристина (дав ба масофаи 400 метр ва 400 метр бо монеа);
Дерипаскин Григорий (дав ба масофаҳои 200 ва 400 метр);
Атабаев Даврон (дав ба масофаи 400 метр);
Исматов Одилшоҳ (дав ба масофаи 800 метр).

Рақобатҳои варзишгарон аз намуди варзиши сабук 25 август дар шаҳри Ҷакарта оғоз мегардад ва то 30 август идома меёбад. Варзишгарони мо пеш аз мусобиқа дар шаҳри Тошканд ба ҷамъомади 15-рӯзаи тамринӣ фаро гирифта мешаванд ва аз он ҷо 22 август ба Ҷакарта парвоз мекунанд.
Мусобиқаи варзиши сабук аз рӯи 24 қувваозмоӣ миёни мардон ва занон доир мегардад, ки варзишгарони мо дар 6 намуди он ширкат мекунанд.

Гӯштини кураш:

Вазни -66 кило
Додов Орифҷон
Ҳалимов Баҳодур

Вазни -81 кило
Муродов Акмал
Хоҷазода Беҳрӯз

Вазни-90 кило
Раҳмонов Ҳоҷимашраб
Ғазалшои Давлатшо

Вазни+90 кило
Хоркашев Набимуҳаммад
Саидов Саидҷалол

Мусобиқа оид ба кураш 28-30 август дар шаҳри Ҷакарта доир мегардад. Мусобиқаи кураш дар 4 категорияи вазнӣ миёни мардон (-66 кило, -81 кило, -90 кило, +90 кило) ва 3 дараҷаи вазнӣ миёни занон (-52 кило, -63 кило, -78кило) баргузор мешавад, ки варзишгарони мо дар ҳар 4 вазн миёни мардон ширкат мекунанд.
Гӯштини кураш бори аввал ба барномаи Бозиҳои тобистонаи Осиё ворид карда шудааст. Ин намуди варзиш ба барномаи Бозиҳои осиёии дохили толор ва ҳунарҳои размӣ ворид гардида буд, ки соли гузашта дар Ашқобод варзишгарони мо соҳиби як медали нуқра (Хоҷазода Беҳрӯз, -73 кило) ва ду биринҷӣ (Насимов Фирдавс, -100 кило, Хусравов Хушқадам, -66 кило) гардида буданд.

Гӯштини самбо:
Вазни -52 кило
Сангов Сомон
Ҷомии Ҳасан

Вазни -90 кило
Комроншоҳ Устопириён
Ҳасанбеков Умед

Қуваозмоиҳои варзишгарони Осиё оид ба гӯштини самбо 31 август – 1 сентябр дар шаҳри Ҷакарта аз рӯи 2 дараҷаи вазнӣ миёни мардон (-52 кило, -90 кило) ва 2 дараҷаи вазнӣ миёни занон (-48 кило, -68 кило) баргузор мегардад, ки варзишгарони мо дар ҳар 2 вазн миёни мардон ширкат мекунанд.

Гӯштини самбо низ мисли кураш бори аввал ба барномаи Бозиҳои тобистонаи Осиё ворид карда шудааст. Соли гузашта дар Бозиҳои осиёии дохили толор ва ҳунарҳои размӣ дар Ашқободи Туркманистон Ҷомии Ҳасан медали нуқра, Ҳасанбеков Умед медали биринҷӣ ба даст оварда буданд.