ВАРЗИШ
Панҷшанбе 30 Июн 2022 09:17
8746
Теннис яке аз намудҳои дӯстдоштаи варзиш буда, дар Тоҷикистон ҳаводорони зиёд дорад. Теннис аз навъҳои варзиш аст, ки дар аксар идораҳо низ метавон тахтаи бозии онро дид. Аммо ба назар мерасад, ки ба таври ҳирфавӣ мо варзишгарони кам дорем ё фаъолияти онҳо барои оммаи васеъ маълум нест.

Доир ба ин мушкилот ва бурду бохти як соли охири ин намуди варзиш бо Абдурасул Муҳиддинов, ёрдамчии президенти Федератсияи тенниси Тоҷикистон суҳбат намудем.

- Дар соли 2021 кадом нақшаҳои Федератсия амалӣ шуд ва кадомаш не?

- Соли 2021 Федератсияи теннис нақшаҳои зиёд дошт, аммо бо сабаби бемории коронавирус натавонист ҳамаи нақшаҳояшро амалӣ намояд. Бо вуҷуди ин тавонистем зиёда аз 8 мусобиқа баргузор намоем.

- Соли гузашта теннисбозони тоҷик дар чанд мусобиқаи ҷаҳонӣ иштирок карда тавонистанд?

- Соли гузашта теннисбозони тоҷик дар бисёр мусобиқаҳои ҷумҳуриявӣ ва берун аз он иштирок намудаанд. Аз ҷумла, дар Қазоқистон, Ӯзбекистон иштирок намуда, сазовори ҷойи сеюм гардиданд.

- Соли равон чӣ нақшаҳо доред?

- Дар соли 2022 Федератсия нақша дорад, ки дар 12 мусобиқаи байналмилалӣ иштирок кунад. Дар солҳои пеш мо дар чунин мусобиқаҳо баромад намекардем, сабабаш ҳам ин буд, ки ба мушкилоти зиёд мувоҷҷеҳ шуда будем. Солҳои 2007-2015 фаъолияти Федератсия қариб қатъ шуда буд.

- Чаро варзишгарони ин риштаро дар мусобиқаҳои байналмилалӣ кам мебинем?

- Вақте варзишгарони риштаи теннис ба синни 17 мерасанд, бо сабабҳои гуногун аз ин варзиш даст мекашанд. Бархе аз онҳо ба хориҷи кишвар ва бархеи дигар ба донишгоҳҳо дохил шуда, аз варзиш дур мешаванд.

- Барои он ки теннисбозон дар мусобиқаҳои ҷаҳонӣ иштирок намоянду Парчами меҳанро баланд бардоранд, чӣ корҳоро бояд ба анҷом расонем?

- Бояд шароит муҳайё сохт. Таҷҳизоти варзиши теннис бисёр гарон асту хароҷоти зиёд дорад. Ба мо сарпарастон лозим. Федератсия ба танҳоӣ наметавонад, мушкилиҳои дар пеш истодаро ба пуррагӣ ҳал намояд.

- Федератсия ҳар сол барои дастгирии варзишгарони ҷавон чӣ корҳоро ба анҷом мерасонад?

- Федератсия ҳар сол ба варзишгаронаш либос, ракетка, тур, умуман ҳамаи таҷҳизотҳоро дастрас мекунад. Ба дигар мусобиқаҳои берун аз кишвар сафарбар мекунад. Варзишгароне, ки дар дастаи мунтахаби Тоҷикистон ҷойҳои намоёнро гирифтааст, дастгирӣ мекунад.


Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3

Июн 2022 c.