Варзишгарони тоҷик Шаҳриёр Даминов ва Амир Бобоҷонов дар Чемпионати Осиё оид ба қаиқронӣ дар байдарка ва каноэ, ки рӯзҳои 8-10-уми май дар шаҳри Нанчани Чин доир гардид, медали биринҷӣ ба даст оварданд.

Ба иттилои Федератсияи қаиқронии Тоҷикистон, Шаҳриёр Даминов ва Амир Бобоҷонов дар каноэи дукаса ба масофаи 1000 метр мақоми сеюмро касб карда, бо нишони биринҷӣ сарфароз гаштанд.

Намояндаи дигари Тоҷикистон Муҳаммадӣ Раҷабов дар каноэи яккаса ба масофаи 1000 метр ба даври ниҳоӣ роҳ ёфт, аммо натавонист медал бигирад.

Дар Чемпионати Осиё оид ба қаиқронӣ дар байдарка ва каноэ дар Нанчани Чин 280 варзишгар аз 19 кишвар иштирок намуда, дар масофаҳои 200, 500 ва 1000 метр рақобат карданд.

Мусобиқаи имсола дар Нанчани Чин бисёре аз дастаҳои пурқуввати минтақаро гирди ҳам овард ва барои варзишгарон як фурсати муҳиме шуд, ки ба Бозиҳои осиёӣ ва олимпӣ омода шаванд.