Фирӯз Мирзораҷабов дар Чемпионати Осиё оид ба гуштин миёни наврасон, ки дар пойтахти Қазоқистон шаҳри Нурсултон ҳамин рӯз оғоз шуд, сазовори медали тилло гардид.

Ӯ аз намуди гуштини юнонӣ-римӣ дар вазни 55 кило қувваозмоӣ намуда, дар даври аввал озод буд. Сипас бар варзишгарони Туркманистон ва Қазоқистон пирӯз шуда, ба финал роҳ ёфт. Дар финал варзишгари узбекистонӣ  Атабаев Аброрро бо ҳисоби 4:2 шикаст дода, унвони қаҳрамони ин мусобиқаро сазовор гардид. Ҷойҳои сеюмро дар ин вазн варзишгарони Қазоқистон ва Ҳиндустон ишғол намуданд.

Дар рӯзи аввали чемпионат қувваозмоиҳо аз рӯи 7 вазн сурат гирифт, ки варзишгарони мо дар 4 вазн гуштин гирифтанд. Ду варзишгари дигари мо – Суҳроб Алимов дар вазни 45кг ва Давлатҷон Худойбердиев дар вазни 48кг сазовори ҷойҳои панҷум шуданд.

Фардо қувваозмоиҳо дар се вазни боқимондаи гуштини юнонӣ-римӣ (65, 71, 80) идома меёбанд, ки дар ҳар се вазн гуштингирони навраси тоҷик ширкат хоҳанд кард. 

Ёдовар мешавем, ки дар ин чемпионат 308 варзишгар аз 19 давлати қитъаи Осиё ширкат доранд ва ҷумҳурии моро дар он, ки то 7 июл идома меёбад, 13 варзишгар намояндагӣ мекунанд.